Me rastin e përvjetorit të 16 të shuarjes së Presidentit Historik dr. Ibrahim Rugova, Kryesia e Degës së LDK-së në Suedi mbajti një Akademi Përkujtimore, në platformën digjitale.
Rrahman Rrahmani sekretar organizativ i Degës së LDK-së e hapi Akademinë Përkujtimore dhe foli për biografinë e Presidentit Rugova.
Kryetarja e Degës së LDK-së në Suedi Qibrije Hoxha dhe nënkryetari Remzi Basha mbajtën fjalë rasti, kurse pjesëmarrësit tjerë, anëtarë të Kryesisë dhe mysafirët nga RTV RUGOVA që ishin të ftuar, evokuan kujtime për Presidentin Rugova.
U përkujtua jeta, puna kolosale, sakrifica e Arkitektit të Pavarësisë së Kosovës, Presidentit tonë Historik dr. Ibrahim Rugova. Shumica e pjesëmarrësve, veprimtarëve të LDK-së përkujtuan takimet që i kanë pasë me Presidentin Rugova në kuadër të organizimit të takimeve me personalitete të larta shtetërore në vendet ku jetojnë.
Besimi, motivi dhe dashuria për Kosovën, që Presidenti Rugova na la trashëgim, si dhe sakrifica sublime e Adem Jasharit me familje, do të përcillet brez pas brezi, për një Kosovë shtet të zhvilluar, demokratik duke ruajtur përjetësisht miqësinë me SHBA-të dhe vendet mike të Kosovës.
Në fund nga kjo Akademi përkujtimore, Familjes së Presidentit Rugova iu dërgua një telegram përshëndetës.
