Gara me qentë që u zhvillua në fshatin Katund i Ri në Pejë pasditen e së martës përfundoi me tentim vrasje. Babë e bir nga familja Gashi dyshohet se u sulmuan nga disa persona, të cilët akoma nuk janë kapur nga Policia. Njëri nga viktimat që dyshohet se u godit me mjete të forta u dërgua në QKUK për shkak të gjendjes serioze, ndërkohë që kanë nisur kërkimet për të dyshuarit që ndodhen në arrati. Njëri prej tyre i cili është identifikuar nga Policia është lajmëruar gjatë ditës së sotme në Gazetën Sinjali. Ai akuzon Policinë në Pejë për mostrajtim të rastit objektivisht dhe thotë se nuk do të dorëzohet pasi nuk është i mbrojtur.
Sinjali ju sjellë më poshtë identitetin e të riut nga Peja dhe rrëfimin e tij për këtë rast që dyshohet se lidhet me një mosmarrëveshje që ka pasur me viktimën kohë më parë.
Fillimisht gjatë ditës së sotme, Gazeta Sinjali ka raportuar për këtë rast që u denoncua nga një dëshmitar, i cili ka pretenduar se ka parë ngjarjen në tërësi dhe që ka dërguar në spital viktimat. Bazuar në dëshminë tij, pesë personat e dyshuar, njëri prej të cilëve i armatosur me kallash, ndërsa katër të tjerë me shufra të drurit, kanë filluar të sulmojnë fizikisht dy viktimat duke i goditur pa ndërprerë derisa kanë rënë në tokë.
Njëri prej të dyshuarve që është identifikuar nga Policia është Endrit Gashi, i cili nga arratia është lajmëruar në Sinjali dhe ka dhënë versionin e tij të ngjarjes, që sipas tij lidhet me një konflikt që ka pasur me njërin nga viktimat, Agron Gashin.
Sipas Endritit, i cili thotë se nuk ka asnjë lidhje familjare me viktimat, në rastin e fundit ka vepruar në vetëmbrojtje, pasi thotë se Agroni bashkë me babain e tij Mentorin kanë tentuar ta therin me thikë. I riu e arsyeton sulmin duke thënë se “U duftë me mbrojtë veten ose me metë i vdekun nvend”,
“Dje ata kanë tentu me m’ther me thika, une sulmu si kom hiç. Ia kom fut dy herë përpjetë edhe jom largu sa me i tërhekë prej meje, mos me mu afru me m’therë e mem bo najsen se s’jonë tu m’lonë vend kërkah veç mos me dalë prej shpisë teme s’kom mbrojtje as prej policisë as kërkujt.”
Ndonëse po kërkohet nga Policia, ai thotë se nuk do të dorëzohet pasi s’ka besim e as mbrotje, pasi disa herë më parë i ka denoncuar viktimat për kërcënimet që pretendon se ia kanë bërë.
“5 herë viktimë, jom shku polici m’kanë rre mkanë llomit. As ni ditë dënim se kanë honger personat n fjalë. Rasti o se m’kanë lodh qe dy vjet tu m’kërcnu me jetë, t’u më marrë pare e telefona e ça m’kanë nxonë Agroni me shokë të vet kohës fundit ia ka nisë edhe baba i Agronit. 5 herë e kom lajmëru në polici, s’kanë ndërmarrë masa, e mbramta herë u konë para tri nate. E kom lajmëru mkanë rre baba e djali, thikën fyt ma kanë qitë”, tha Endriti për Sinjalin.
Mosveprimi i Policisë ndaj të dyshuarve siç thotë ai, po e shtyjnë që të mos kërkojë ndihmë e as mos të lajmërohet, pasi nuk po i ofrojnë mbrojtje. I mllefosur Endirit u shpreh se “nuk i bi në dorë Policisë në Pejë”, duke i fajësuar për këto raste.
“Unë sdi as ku mu mbështet mo. Dje kanë tentu me thika apet edhe ndodhi qajo. S’kom unë mbrojte prej tynve as nuk kom pas deri sot. Ata me njoftësi e kanë bo ketë punë. krejt iboi policis pejes nuk ibi në dorë përjetë as të Vitomericë ata jon shkak kryesor”, thotë ai tutje.
Konflikti mes tyre dyshohet se lidhet me një ngatërresë që Endriti ka me Agronin që dy vjet, por akoma nuk janë pajtuar, prandaj sipas tij kanë pasur këto incidentet e kërcënime.
“Rasti ka ndodh qe dy vjet e knej prej një ngatërrese mes meje edhe Agronit, djalit të mentorit ku lypke pare për me u pajtu. Unë pare s’kom jep edhe tani vazhdimisht m’kanë kërcënu ai me shokë tëvet, ku edhe i kom lajmëru në Polici, po s’kanë ndërmarrë masa as Policia as Prokuroria. Tash kohës s fundit m’ka rreh para tri nete me babë t’vet. Agroni edhe Mentori ma kanë qitë thikën në fyt. I kom lajmëru s’ka ndërmarrë masa Policia. M’kanë maltretu që dy vjet e në fund më morën në qafe, s’di kah me ia majtë mo. Ku me nejtë more n’shpi i rrezikum knej Policia, knej ata”.
“As policia sem nimon, ska nevoj mem nimu po spe bon punen drejt”, tha ai në fund duke shtuar se nuk ka guxim të dorëzohet në Polici pasi deri më sot nuk i kanë ofruar mbrojtje.
Rastin për tentim vrasje e kanë konfirmuar për Sinjalin edhe nga Policia Rajonale në Pejë dhe kanë bërë të ditur se katër persona dyshohet se janë përfshirë në rast, të cilët akoma s’janë arrestuar.