Hamza pranon ftesën e Kurtit për takim, ja kur takohen

Kryetari i Partisë Demokratike të Kosovës, Bedri Hamza, e ka pranuar ftesën e kryetarit të Vetëvendosjes, Albin Kurti, për një takim të premten, për të diskutuar për formimin e institucioneve. Hamza ka thënë se përgjigjja e tij ka qenë për takim në orën 9.

Hamza ka thënë para mediave, pas takimit të Kryesisë së PDK-së, se kjo parti e ka më me prioritet adresimin e sfidave të Kosovës sesa ndarjen e posteve.

“Unë do të sillem në mënyrë të përgjegjshme dhe institucionale. Nuk jam kundër që të ketë takime, mirëpo para se të flasim për pozitat e kam thënë dhe e ripërsëris është tepër e rëndësishme prioritetet, vizioni për të ardhmen, programi, adresimi i sfidave të cilat i ka Kosova. Nëse nuk ka dakordim për këto, nuk është qëllimi i PDK-së të ketë një numër të caktuar të ministrive, të ketë një kryetar kuvendi, presidentin apo sidoqoftë”, ka deklaruar ai.