Dështon edhe seanca e 12-të: Opozita sërish nuk pranon votim të fshehtë

Ka dështuar për të 12-ën herë seanca konstituive e Kuvendit të Kosovës, si shkak ajo u ndërpre përsëri.

Pasi u mblodhën të gjithë 113 deputetët, kryesuesi i seancës, Avni Dehari mori fjalën.

Edhe në seancën e sotme Dehari ka propozuar për votim të fshehtë.

Partitë opozitare kanë insistuar në qëndrimet e tyre që nuk e përkrahin votimin e fshehtë, pasi është në kundërshtim me rregulloren.

Kryesuesi Dehari ka kërkuar nga partitë të propozojnë kandidatët për anëtarë të komisionit votues për votim të fshehtë.

PDK-ja dhe LDK-ja edhe këtë herë nuk e kanë propozuar asnjë emër. Njëjtë, ka vepruar edhe Lista Serbe, e cila edhe më herët doli kundër. Kandidat nuk ka prezantuar as AAK-ja.

56 vota ishin për, një kundër e asnjë abstenim.

Seanca konstituive vazhdon të premten me fillim nga ora 10:00.