Banorët e Kullës 3 në Emshir: Uji i shiut po depërton në banesa pas zjarrit

Banorët e Kullës nr. 3 në lagjen Emshir po përballen me pasoja gjithnjë e më të rënda pas një zjarri që ndodhi në muajin qershor të këtij viti, i cili shkrumboi kulmin e ndërtesës dhe dëmtimet e të cilit nuk janë sanua as sot e kësaj dite.

Pas zjarrit, kulmi i ndërtesës ka mbetur i hapur, dhe me fillimin e reshjeve të vjeshtës, uji i shiut ka filluar të depërtojë jo vetëm në banesat e katit të 10-të, por edhe në ato të katit të 9-të dhe më poshtë. Banorët raportojnë dëme në mobilje, mure, dysheme dhe instalime elektrike, ndërkohë që situata po përkeqësohet dita-ditës.

“Uji i shiut po hyn përditë në banesën time. Është kthyer në një rrezik serioz për shëndetin dhe sigurinë tonë. Askush nuk po merr përgjegjësi”, thotë Sabit Restelica, banor i katit të 9-të.

Banorët kanë kërkuar ndihmë nga Komuna e Prishtinës dhe Agjencioni për Menaxhimin e Emergjencave, por deri tani nuk është ndërmarrë asnjë veprim konkret.

Përveç dëmeve nga uji i shiut, banorët raportojnë edhe probleme me rrjetin e kanalizimit, ku ujërat atmosferikë po shkaktojnë grumbullime të ujit dhe kundërmim të rëndë në hapësirat e përbashkëta, duke rrezikuar seriozisht shëndetin publik.

Banorët kërkojnë ndërhyrje të menjëhershme nga institucionet përkatëse për: Riparimin e kulmit të ndërtesës, ndihmë emergjente për banorët e dëmtuar, sanimin e kanalizimeve dhe largimin e ujërave të grumbulluara.

Ata theksojnë se janë lënë “nën mëshirën e natyrës”, ndërsa institucionet përgjegjëse nuk kanë marrë asnjë hap konkret për të ofruar zgjidhje.