Spitali i Pejës jep detaje për të lënduarit në vet-aksidentin me fatalitet në Dollc

Spitali i Përgjithshëm në Pejë ka dhënë detaje rreth gjendjes së pacientëve pas vet-aksidentit të rëndë që ndodhi mëngjesin e sotëm në fshatin Dollc të Klinës, ku një person humbi jetën dhe katër të tjerë mbetën të lënduar.

Sipas Policisë së Kosovës, aksidenti ka ndodhur rreth orës 04:55, ndërsa në vendin e ngjarjes kanë dalë njësitet kompetente të Njësitit Rajonal të Komunikacionit Rrugor.

“Si pasojё e kёtij vetaksidenti njё person ka pësuar me fatalitet, vdekjen e sё cilit e kanё konstatuar ekipi mjekёsor nё vendin e ngjarjёs, ndёrsa katёr (4) tё tjerё janё dёrguar nё spitalin rajonal nё Pejё pёr tretman mjekёsor dhe tё njëjtit sipas mjekёve janё jasht rrezikut pёr jetё”, thuhet në njoftimin e Policisë.

Spitali i Përgjithshëm në Pejë ka bërë të ditur se katër personat e lënduar janë pranuar për trajtim mjekësor.

“Pas ofrimit të trajtimit, një person është dërguar për trajtim të mëtejmë në Qendrën Klinike Universitare të Kosovës (QKUK), një person po vazhdon trajtimin në Spitalin e Përgjithshëm në Pejë, ndërsa dy persona janë liruar për në shtëpi në gjendje stabile”, ka njoftuar spitali

Sipas spitalit, personi që humbi jetën nuk është dërguar në Spitalin e Përgjithshëm në Pejë.