Lajmi që Goran Bregovic do të performojë në festën e birrës në Korçë ka nxitur zërin e shumë figurave publike në kundërshtim me pjesëmarrjen e tij. Por Bashkia e Korçës nuk e ndërron axhendën dhe ka bërë të ditur që i qëndron ftesës për këngëtarin me famë botërore e shumë më shumë ballkanike. Por çfarë mendojnë për këtë qytetarët korçarë.
Qytetarët e Korçës ishin të ftuar në fundjavë në një protestë të organizuar kundër ardhjes së këngëtarit serb , por kjo protestë u quajt e ‘dështuar’ pasi morën pjesë vetëm katër persona, ku një ndër to ishte edhe ish deputeti Kujtim Gjuzi. Në pankartën që mbanin në duar emri i këngëtarit ishte shkruar gabim duke e quajtur Gregor Bregovic.
Por afrë mendojnë për këtë qytetarët korçarë? Top Channel në një kronikëtë realizuar dje pyeti disa prej tyre.
Qytetari 1: “Po ne as e njohim fare bre, për herë të parë po I dëgjoj emrin…
Qytetari 2: Çfarë do që të ndodhë janë shqiptarë, kupton, janë shqiptarë… Po pse, nuk kemi ne këngëtarë sa të duash ë? Këngëtarë që u merr vesh se çfarë thonë. Atij çfarë do i marrim vesh?
Qytetarja 3: Artistët mund të venë kudo. Kështu vete edhe çupa ime, Anxhela Peristeri, në tërë botën vete…Kështu që edhe ai le të vijë…
Ndrhyn gazetarja: Është shoqëruar me një debat në fakt…
Qytetarja 3: Po le të bëhet mo debate, ka kudo debate aman, këto avaze janë gjithnjë… Ne edhe më përpara, kur ishim atëhere, e zinim jugosllavin, dëgjonim Zdravkon, dëgjonim të tëra, ska ndonjë gjë, nuk merremi me këto gjëra… Sidomos Korça. Korça është e kulturës.
Ndërkohë që një pjesë e këngëtarëve të Kosovës që ishin të ftuar kanë bojkotuar festën e birrës. Capital T ka publikuar një video në “Instagram” ku tregon se nuk do të jetë pjesë e koncertit, e madje i bën thirrje Bashkisë së Korçës që të anulojë prezencën e këngëtarit serb në Shqipëri, për faktin se konflikti Kosovë-Serbi është ende i hapur.
Jam e bindur që kjo është një dezinformatë ka qenë reagimi i parë që erdhi nga artistja Vesa Luma.
Po ashtu,këngëtarja Besa Kokëdhima, ka bërë thirrje që të bojkotohet pjesëmarrja e Bregoviç në këtë festë pasi sipas saj, ai është një artist i mirë, po jo dhe njeri i mirë.
Edhe reperi Stresi ka zgjedhur ta bojkotojë këtë event, duke i bërë thirrje të gjithëve të ndjekin të njëjtën linjë
Me anë të Instagramit, Noizy ka dhënë një ide për të krijuar një festival po në të njëjtën ditë dhe orë me festën e Birrës në mënyrë që ta bojkotojnë këngëtarin Goran Bregovic
Edhe këngëtarja Dafina Zeqiri iu është bashkuar artistëve të cilët kanë iniciuar nismën “Bojkoto Festivalin”.
Top Channel
