Përkundër faktit se në sallë ishin të pranishëm plot 100 deputetë, deputeti i VV-së dhe njëkohësisht kryesues i seancës, Avni Dehari, refuzoi të hedhë në votim raportin për verifikimin e mandateve të deputetëve.

Në vend se ta procedonte për votim, Dehari vendosi të ftonte partitë politike në një “konsultim”, hap ky që opozita e cilësoi shkelje të rregullores së Kuvendit.

Pas kthimit nga konsultimet, ndodhi e papritura: seanca u ndërpre sërish, me arsyetimin se nuk pati dakordim mes grupeve parlamentare.

Në sallë kishte kuorum – 100 deputetë prezentë – dhe për të miratuar raportin kërkoheshin vetëm 52 vota.

Megjithatë, përfaqësuesit e VV-së nuk dhanë shpjegim të qartë pse u shmang votimi.

Albulena Haxhiu u përpoq të justifikonte vendimin.

“Është jashtëzakonisht e rëndësishme që të ketë unifikim të qëndrimeve të grupeve parlamentare”, tha ajo.

Mimoza Kusari-Lila shmangu një përgjigje të drejtpërdrejtë, duke e lidhur çështjen me zgjedhjet e reja.

“Kemi pasur kuorum, por dokumenti është rrëzu… Nëse nuk ka vullnet për bisedime, shkojmë në zgjedhje të reja.”

Dimal Basha nuk pranoi të përgjigjej fare në pyetjet e gazetarëve, por sulmoi LDK-në, duke e akuzuar për mashtrime zgjedhore dhe mandate të paligjshme.

“LDK është problemi – kanë deputetë jolegjitimë në këtë Kuvend!”

Nga radhët e opozitës pati reagime të forta. Kryetari i PDK-së, Memli Krasniqi, tha se VV e shmangu votimin sepse nuk i kishte votat.

Ndërsa LDK, në një komunikatë për media, deklaroi qartë: “Pushteti ka shkelur rregulloren e Kuvendit.”

Seanca u ndërpre pa një vendim të qartë, ndërsa situata po tensionohet dhe skenari i zgjedhjeve të reja po bëhet gjithnjë e më i afërt.