Rozeta Hajdari, ministre e Industrisë, Ndërmarrësisë dhe Tregtisë, e ka pranuar fajësinë për mosdeklarim të pasurisë brenda afatit ligjor.
Kështu ka thënë ajo në seancën fillestare, pas leximit të aktakuzës nga prokurori Bekim Kodraliu.
“Duke e ditur që është një procedurë që duhet të respektohet, unë duhet ta pranoj si faj që është kalu ky afat dhe e kam dorëzu në fund të mandatit, unë e pranoj me keqardhje se është kalu një afat dhe kam marrë një këshillë të gabuar”, deklaroi ministrja Hajdari, shkruan Betimi për Drejtësi.
Erdhi pas 5 vitesh në Kosovë, tmerrohet mërgimtari kur hyn në shtëpi
Sipas saj, mungesa e informacionit të plotë rreth shtyrjes së afatit, ka krijuar konfuzion.
“Unë e konsideroj veten që për shkak të mungesës së informacionit të plotë kur janë shtyrë afatet, unë kam konsideruar që e dorëzoj në fund të mandatit, ashtu qysh jam këshillu dhe tash unë e pranoj sepse paska qenë një gabim. Unë sot po e di në seancë që paska qenë një gabim, sepse jam këshillu që është shty afati dhe ka kriju konfuzion shtyrja e afatit”, ka thënë tutje Hajdari gjatë deklarimit të saj rreth fajësisë.
E njëjta ka thënë se ky është një gabim për të cilin ajo ndihet keq dhe është një faj që këtë afat e ka lëshuar për shkak të gjendjes me pandeminë dhe për shkak të krizës së bizneseve.
Shpallja e aktgjykimit për këtë rast do të bëhet nesër, më 29 dhjetor 2022.
Ndryshe, në tetor Prokuroria Themelore në Prishtinë e kishte ngritur aktakuzën ndaj ministres Hajdarit, për shkak të mosdeklarimit me kohë të pasurisë.
Me 15 mars të këtij viti, Agjencia Kundër Korrupsionit kishte nisur hetimet kundër ministres Rozeta Hajdari pas mosraportimit të biznesit në formularin e pasurisë, vitin e kaluar.
“Ju njoftojmë se Agjencia kundër Korrupsionit, nga monitorimi i rregullt i mediave ka identifikuar informatat lidhur me Biznesin e zyrtarit të apostrofuar, dhe rrjedhimisht është duke verifikuar rastin nga departamentet përgjegjëse”, thuhet në përgjigjen e Kundër Korrupsionit pas pyetjeve të Gazetës Insajderi.
Gazeta ka zbuluar se ministrja e Industrisë, Ndërrmarrësisë dhe Tregtisë, s’e ka deklaruar biznesin e saj në Agjencinë Kundër Korrupsion.
Hajdari në formularin e zbardhjes së pasurisë, nuk ka treguar se është pronare e “R&V Consulting”, biznes ky që është aktiv në Agjencinë e Regjistrimit të Bizneseve.
Ministrja këtë biznes e ka hapur qysh në dhjetor të vitit 2008, i cili për aktivitet primar e ka këshillimin e bizneseve për menaxhim, shkruan Gazeta Insajderi.
Këtë kompani, ministrja Hajdari, e ka ‘prezantuar’ vetëm në profilin e saj në Linkedin, por në asnjë rrjet tjetër social.
Aty shkruan se Hajdari ka qenë në krye të kësaj kompanie nga janari i vitit 2009, deri në shkurt të vitit 2020, kur është votuar qeveria Kurti 1, por pavarësisht kësaj biznesi vazhdon të jetë aktiv në Agjencinë e Regjistrimit të Bizneseve në Kosovë.
Ministrja nuk e ka njoftuar ARBK-në, institucion ky që funksionin brenda dikasterit të saj, nëse ajo i ka kaluar aksionet tek ndonjë idivid tjetër, ose nëse i ka shitur ato – në faqen ku figurojnë bizneset – “R&V Consulting” vazhdon të jetë në emër të saj, shkruan Gazeta Insajderi.
Gazeta Insajderi e ka pyetur ministren Hajdari, pse nuk e ka deklaruara kompaninë në AKK, por e njëjta ende nuk ka kthyer përgjigje.
AAK bën kallëzim kundër Rozeta Hajdarit për mosdeklarimi me kohë të pasurisë
Agjencia Kundër Korrupsionit me 16 mars ka bërë kallëzim penal ndaj ministres së Industrisë, Rozeta Hajdarit
Lajmin e ka konfirmuar drejtori i AKK, Yll Buleshkaj, i cili tha se kallëzimin penal e ka dorëzuar në Zyrën e Kryeprokurorit të Shtetit.
“Ju njoftojmë se Agjencia kundër Korrupsionit (AKK), për zyrtarin në fjalë ka përcjell kallëzim penal në Zyrën e Kryeprokurorit të Shtetit lidhur me veprën penale “Mos raportimi ose raportimi i rremë i pasurisë, i të ardhurave, i dhuratave i dobisë tjetër materiale ose i detyrimeve financiare” nga neni 430 paragrafi 1 të Kodit Penal të Kosovës”, ka thënë Buleshkaj.
Gazeta Insajderi mëson se kallëzimi penal ndaj Hajdarit është bërë për shkak se e njëjta nuk e ka deklaruar në kohën e paraparë pasurinë e saj, por disa ditë më vonë.
Procesi i deklarimit të rregullt vjetor të pasurisë së zyrtarëve të lartë publik, ku të gjithë zyrtarët e lartë publikë janë të obliguar ta bëjnë deklarimin e pasurisë së tyre në Agjencisë Kundër Korrupsionit fillon zakonisht më 1 mars, dhe përfundon më 31 të po atij muaji, shkruan Gazeta Insajderi.
Për kallëzimin penal ndaj saj, ka reaguar edhe ministrja Hajdari.
“Sot u njoftova nga mediat se Agjencia kundër Korrupsionit (AKK) ka dorëzuar kallëzim penal kundër meje për gjoja mosdeklarim ose deklarim të pasaktë të pasurisë. Gjatë gjithë kohës si zyrtare publike, unë kam përmbushur detyrimin ligjor për deklarim të pasurisë dhe deklarimet përkatëse ndodhen në faqen e AKK-së”, ka shkruar Hajdari në profilin e saj në Facebook.
Sa e pasur është Rozeta Hajdari?
Ministrja e Industrisë, Ndërrmarrësisë dhe Tregtisë, Rozeta Hajdari, në formularin e pasurisë të vitit 2021, ka deklaruar se një banesë dh një veturë.
Hajdari ka kallëzuar se e ka një banesë 60 metra katror, të cilën e ka blerë 50 mijë euro nga kursimet dhe pagat e saj.
E para e MINT posedon edhe një veturë Ford Fiesta, të cilën e ka blerë në vitin 2005, dhe kushton afërsisht 3 mijë euro.
Ajo poashtu ka deklaruar se merr 1 mijë e 321 pagë nga buxheti i shtetit, për postin që mban.
Rozeta Hajdari në qeverinë Kurti 1 ka mbajtur pozitën e ministres së Ekonomisë, Tregtisë dhe Financave, ndërsa në qeverinë Kurti 2 mban pozitën e Industrisë, Ndërrmarrësisë dhe Tregtisë.
Kur e deklarojnë pasurinë zyrtarët e shtetit?
Procesi i deklarimit të rregullt vjetor të pasurisë së zyrtarëve të lartë publik, ku të gjithë zyrtarët e lartë publikë janë të obliguar ta bëjnë deklarimin e pasurisë së tyre në Agjencisë Kundër Korrupsionit fillon zakonisht më 1 mars, dhe përfundon më 31 të po atij muaji.
Sivjet deklarimit të pasurisë do t’i nënshtrohen rreth 4737 zyrtarë të lartë publikë, proces ky që ka nisur në fillim të muajit, dhe do të zgjasë edhe 16 ditë.
“Drejtori i Agjencisë kundër Korrupsionit, z. Yll Buleshkaj, ri-kujton të gjitha subjektet deklaruese se mos-deklarimi i rregullt i pasurisë nga zyrtarët publik, konform obligimeve ligjore, detyron Agjencinë kundër Korrupsionit që të paraqesë kallëzim penal në pajtim me nenin 430 të Kodit Penal”, thuhet në njoftimin e AKK-së të lëshuar më 11 mars, ku tregohet se 600 zyrtarë publikë e kanë deklaruar pasurinë deri atë ditë./Botapress.info/
