Instituti Demokratik i Kosovës ka reaguar pas zhvillimeve në seancën e sotme për arrestimin e kryeshefit të KEK-ut, Nagip Krasniqit, ku u përfshinë edhe kryeministri Kurti e ministrja Rizvanolli.
KDI ka thënë që është “absurde që në njërën anë të kërkohet intensifikim i luftës kundër korrupsionit, e në anën tjetër, të sulmohet Prokuroria kur e njëjta ndjek penalisht afera korruptive ku potencialisht janë të përfshirë zyrtarë të emëruar apo që kanë lidhje me pushtetin”.
Basha i del kundër Qeverisë: Nuk e votoj këtë ligj, është gabim
KDI vlerëson se ndërhyrjet dhe sulmet mbi punën e institucioneve të drejtësisë nuk i shërbejnë luftës kundër korrupsionit.
Reagimi i plotë:
𝐊𝐃𝐈: 𝐓𝐄̈ 𝐍𝐃𝐀𝐋𝐄𝐍 𝐍𝐃𝐄̈𝐑𝐇𝐘𝐑𝐉𝐄𝐓 𝐄 𝐏𝐔𝐒𝐇𝐓𝐄𝐓𝐈𝐓 𝐍𝐄̈ 𝐏𝐔𝐍𝐄̈𝐓 𝐄 𝐃𝐑𝐄𝐉𝐓𝐄̈𝐒𝐈𝐒𝐄̈
Që nga arrestimi i djeshëm i kryeshefit ekzekutiv të KEK-ut, mbi bazën e akuzave për korrupsion, janë intensifikuar deklarimet dhe akuzat nga eksponentë të partisë në pushtet ndaj sistemit prokurorial, e në veçanti Prokurorisë Speciale.
Gjatë seancës së sotme të Kuvendit, Kryeministri Albin Kurti si dhe ministrja Artane Rizvanolli, kanë akuzuar Prokurorinë Speciale për ndjekje selektive të rasteve të korrupsionit. Deklarimet sistematike të zyrtarëve më të lartë qeveritar përbëjnë ndërhyrje dhe presion të drejtpërdrejtë në punën, pavarësinë dhe integritetin e prokurorisë. Ndërhyrjet si këto bien ndesh me zotimet e Qeverisë për forcimin e sundimit të ligjit dhe respektimin e parimit të ndarjes së pushteteve.
Është absurde që në njërën anë të kërkohet intensifikim i luftës kundër korrupsionit, e në anën tjetër, të sulmohet Prokuroria kur e njëjta ndjek penalisht afera korruptive ku potencialisht janë të përfshirë zyrtarë të emëruar apo që kanë lidhje me pushtetin.
Për më keq, atakimi i prokurorisë dhe mbrojtja e individëve partiak që po hetohen për raste të korrupsionit është bërë edhe nga disa deputetë të Lëvizjes Vetëvendosje. Shfrytëzimi i foltores së Kuvendit për të ushtruar presion mbi sistemin e drejtësisë, e në veçanti duke shënjestruar udhëheqës të sistemit prokurorial, është i papranueshëm dhe duhet të ndërpritet menjëherë.
Ndërhyrjet dhe sulmet mbi punën e institucioneve të drejtësisë nuk i shërbejnë luftës kundër korrupsionit, si dhe minojnë besimin dhe pritshmëritë e publikut për sundim të ligjit.