Kryetari i Listës Serbe, Goran Rakiq, nënkryetari Igor Simiq dhe Kryetari i Mitrovicës veriore, Milan Radojeviq, kanë mbajtur sot takim me anëtarët e Këshillit Evropian për Marrëdhënie me Jashtë.
Në këtë takim, Rakiq, i cili njëherësh është edhe ministër i Ministrisë për Kthim dhe Komunitete, së bashku me Simiq dhe Radojeviq kanë deklaruar se Prishtina duhet t’i zbatojë marrëveshjet e nënshkruara, duke përmendur këtu edhe marrëveshjen për themelimin e Asosacionit të Komunave me Shumicë Serbe
Sipas ministrit Rakiq, themelimi i asociacionit nuk është një tekë e Listës Serbe, por një detyrim ndërkombëtar, përmbushjen e të cilit, sipas Rakiq, e ka garantuar vet Bashkimi Evropian.
“Marrëveshjet e Brukselit duhet të zbatohen, sepse ato janë nënshkruar, ato obligojnë gjithçka, dhe sepse kjo është mënyra e vetme që ne mund të arrijmë kushte më të mira jetese dhe t’i ndërtojmë njëri-tjetrit besimin që na nevojitet sot”, thuhet në njoftimin e Listës Serbe.
Më tej, në këtë takim është diskutuar edhe për operacionet e Njësisë Speciale të Kosovës në veri të vendit, të cilat janë cilësuar si veprime kundër popullit serb dhe janë të rrezikshme, sepse sipas tyre, shkaktimi i frikës dhe trazirave mund të kërcënojë edhe më tej situatën e sigurisë.
“Theksohet se Lista Serbe mbështet dialogun si mënyrë themelore për zgjidhjen e të gjitha problemeve dhe çështjeve të hapura, sepse dialogu është e vetmja rrugë dhe vendi ku mund të zgjidhen këto çështje dhe kërkon që të gjithë, veçanërisht nga Bashkimi Evropian të bëjnë gjithçka”, thuhet në njoftim, percjell Botapress.info
