Kryetari i Shoqatës së Malazezëve të Kosovës, Slobodan Vujicic, ka konfirmuar se me 18 dhe 19 maj, presidenti i Malit të Zi, Milo Djukanovic, do të vije për vizitë zyrtare në Kosovë, shkruan Gazeta Botapress.info
Gazeta , dje ka raportuar ekskluzivisht për ardhjen e presidentit të Malit të Zi, Milo Djukanovic javën e ardhshme në Kosovë
Ashtu siç raportoi Metro dje, Djukanovic do të jetë në Kosovë për dy ditë, konkretisht me datë 18 dhe 19 maj.
Lidhur me këtë vizitë dhe për çështjen e demarkacionit ka folur Kryetari i Shoqatës së Malazezëve të Kosovës, Slobodan Vujicic.
Ai ka thënë se edhe pse demarkacioni mes Malit të Zi dhe Kosovës ka përfunduar pa mundësi rishikimi të tij, po bëhen gjithnjë e më të shpeshta dhe më të zhurmshme deklaratat e disa zyrtarëve kosovarë se çështja nuk është mbyllur.
“Ringjallja e kësaj teme, e cila rëndoi shoqërinë kosovare dhe u shoqërua me dhunë në rrugët e Kosovës dhe në Kuvend, është një provokim i rrezikshëm por i kotë me synimet e fundit. Duke pasur parasysh se presidenti i Malit të Zi, Milo Djukanovic, do të zhvillojë vizitën e tij të parë zyrtare në Kosovë më 18 dhe 19 maj, presim që pas takimeve të planifikuara, Prishtina zyrtare përfundimisht t’i pranojë faktet dhe t’i japë fund demarkacionit ndërmjet dy shtete”, ka thënë Vujicic.
Tutje ai ka thënë se presim nga presidenti Milo Djukanovic, që të caktojë një afat me kolegët e tij kosovarë për të rinovuar strategjinë e refuzuar për afirmimin dhe integrimin e komunitetit malazez, si dhe një afat për zgjidhjen e pozicionit tonë kushtetues dhe ligjor dhe përfaqësim adekuat në Kuvendin e Kosovës.
“Gjithçka përtej kësaj do të çojë shumë shpejt në shkatërrimin e plotë të qenies etnike malazeze, e cila është përçarë dhe përçarë më tej për shkak të pasojave të situatës në vendin e origjinës”, ka thënë në fund Vujcic.
Presidenti i Malit të Zi, Djukanovic pritet të ketë takime me krerët e lartë shtetërorë si dhe do të mbajë ligjëratë për studentët e një kolegji privat. /Botapress.info/