Përparim Rama: Kemi përfunduar mbi 800 projekte në qytet e fshatra, vizioni ynë është i qartë

Kryetari i Prishtinës, Përparim Rama, në hapjen e fushatës së Lidhjes Demokratike të Kosovës, ka përmendur ish-fabrika, ish-stacione e bunkerë, që sot kanë marrë jetë të re.

Sipas  Ramës, kjo i mundëson kryeqytetit identiteti të ri.

Ai ka përmendur edhe mësimin gjithëditor, si një nga projektet më të suksesshme në kryeqytet.

“Ne të parët në Kosovë treguam se zhvillimi i vërtetë e ripërdor të braktisurën – ish-fabrikë, bunker, ish-stacion, pra struktura që nuk përdoreshin, dëshmuam se munden me marrë jetë të re, me disa ndërhymje në infrastrukturë, që iu mundëson t’i shërbejnë identitetit të ri Shkollën publike, për herë të parë, ne e vumë në shërbim të nevojave bashkëkohore të familjeve e të shoqërisë, duke i kthy tashmë 12 shkolla në mësim gjithëditor. Kështu do të vazhdojmë derisa arsimin publik ta bëjmë gjithëditor në çdo shkollë”, ka thënë Rama.

I pari i kryeqytetit u shpreh se janë mbi 800 projekte të përfunduara në fshatra e qytete, duke vënë theksin edhe te zhvillimi dhe planet që synon në teknologji.

“Këta janë vetëm pak shembuj nga mbi 800 projektet që kemi përfundu në qytet e në fshatra. Sonte nuk është vendi t’i shpalosim të gjitha, por një befasi softuerike që po përgatisim do t’ia tregojë qytetarëve çdo detaj. Me këtë platformë inovative të ndërveprimit në kohë reale, ne po vërtetohemi si pionierë edhe në teknologji. Një gjë është e sigurt: vizioni ynë nuk ndryshon. Ai është i qartë! Prishtina, si një organizëm i gjallë, ku gjithçka është e ndërlidhur, dhe ku njeriu, qoftë ky banor ose jobanor, ndodhet në qendër”, ka thënë Përparim Rama.