Zyrtarët shtetërorë, duke përfshirë edhe pozita të larta të shtetit shpesh kanë qenë cak i kërcënimeve nga persona e grupe të ndryshme dhe për pasojë kanë kërkuar ndihmë e mbrojtje nga Policia. Për një rast të tillë tashmë ka nisur hetimet Prokuroria Themelore në Prishtinë, pas denoncimit të një rasti ku viktimë është një zyrtare e Qendrës për Punë Sociale.
Mësohet se e gjithë ngjarja ka ndodhur të hënën, kur i dyshuari ka kanosur seriozisht duke i cenuar integritetin një zyrtareje të QPS-së në Prishtinë.
Kjo e fundit përballë kësaj situate, e shqetësuar ka denoncuar rastin në Polici, ku para hetuesve policorë ka bërë me dije se kërcënimi lidhet me punën e saj që e kryen në institucionin në fjalë.
Si rezultat i denoncimit, njësitë policore kanë arritur që dje të arrestojnë të dyshuarin dhe i njëjti është shoqëruar në stacion policor për intervistim./Botapress.info/