Zyrtari i partisë “GUXO”, Burim Meta, në një intervistë për Frontal të T7 ka treguar se zgjedhja e dy bashkëkryesuesve të partisë ka qenë ide dhe propozim i Donika Gërvallës, shkruan Gazeta Express.
Meta ka thënë se një ide dhe propozim i tillë ka qenë një informatë bombastike, të cilën thotë se pasi e kanë marrë si informatë e kanë lënë të pushojë pak dhe pak ditë para mbajtjes së Kuvendit, pasi kanë menduar rreth saj, kanë vendosur për po.
“Po, bashkëdrejtues. Fytyra markante të partisë “GUXO”. Pas Vjosës që u bë presidente, ne ishim produkt i saj, që nga fillimi është ditë që si lider pas saj do të jetë Donika Gërvalla, por nga përvoja e saj edhe jashtë Kosovës, ka qenë mendimi dhe propozimi që ne t’i kemi dy bashkëkryesues. Kjo s’ka lindur nga modestia e saj, apo nga ndonjë përçarje, por ka lindur vetëm për shkak të harmonisë. Ka qenë një informatë mjaft bombastike. Ka qenë informatë që e kemi marrë, e kemi lënë të pushojë, kemi menduar. Dhe pak ditë para Kuvendit kemi thënë po. Dhe kështu partia GUXO, me idetë e saj, paraqet ide reformative”, ka thënë Meta në T7.
I pyetur nëse një ide e tilël është anti-ligjore, Meta ka thënë se s’beson meqë në kuvend zgjedhor kanë qenë edhe përfaqësues të KQZ-së.
“Nuk e besoj që mundet me qenë anti-ligjore. Sepse kolegët që janë marrë me organizim të Kuvendit, kanë qenë takime të ditë për dita, kemi pas edhe përfaqësues të KQZ-së që kanë qenë në Kuvendin tonë”, ka thënë Meta.
“Ka një dispozitë që thuhet se partia duhet të ketë kryetarin. Por ne kemi plotësuar një dispozitë, dhe kemi thënë se ne do t’i kemi dy bashkëkryesues”, ka vazhduar tutje.
Ai ka thënë se një rregullim të tillë partiak e kanë edhe në perëndim.
“Shumë organizata kredibile në Evropë kanë një rregullim të tillë. Organizata politike-ekonomike. Dy tri parti në Gjermani, parti që janë në pushtet dhe që kanë treguar sukses të madh”, është shprehur deputeti Burim Meta./
