Autostrada ‘Ibrahim Rugova’ ka mbetur pa ndriçim tash e një kohë, duke mos u ditur arsyet e këtij ‘terri’ në këtë rrugë e cila është shumë e rëndësishme si në aspektin ekonomik, ashtu edhe në ata të lëvizshmërisë më të lehtë të qytetarëve.
I vetmi ndriçim gjatë natës në autostradën ‘Ibrahim Rugova’ janë dritat e veturave si dhe anësoret e rrugës që reflektojnë nga dritat e veturës, pasi që janë të lyera me fosfor.
Ministria e Mjedisit, Planifikimit Hapësinor dhe Infrastrukturës (MIT), në një prononcim për Metron ka folur për këtë çështje, duke thënë se për ndriçimin e autostradës është kontraktuar kompania, e cila do të bëjë edhe sigurimin e autostradës.
“Kompania për mirëmbajtje të autoudhës është përgjegjëse për sigurimin e autoudhës 7/24h, ndërsa operatori ekonomik i kontraktuar për ndriçim do të bëjë vetëm implementimin e kontratës për funksionalizimin e ndriçimit publik”, kanë thënë nga Ministria e Infrastrukturës për Metron.
Ministria tutje ka treguar se vlera e këtij projekti është 417.676.30 euro.
“Projekti për ndriçimin e autoudhës sipas kontratës te cilën e gjeni në e-prokurim është në vlerë 417.767.30 euro.Kompania ka bërë ndriçimin e disa pikave (hyrje – dalje), kontrata vazhdon deri ne muajin maj të vitit 2022”, kanë thënë në fund nga MIT për Metron.
Gazeta Metro ka kontaktuar edhe kompaninë ‘Select Prima’, e cila ka thënë se si pasojë e pandemisë dhe mungesës së materialit, deri tash kanë instaluar vetëm pesë udhëkryqe të autostradës.
“Ne e kemi të kontraktuar projektin, edhe pse pandemi dhe me mungesë të materialit ne deri tash i kemi instaluar pesë udhëkryqet: Albi Mall, Fushë Kosovë, Mazgit, Prizeren Veri dhe Vermicë kufi. Tash jemi duke u përgatit për Suharekën”, ka thënë Muj Mazrekaj nga kompania ‘Select Prima’ për Metron.
Tutje Mazrekaj ka bërë të ditur se 14 trafo të mëdha dhe 54 kuti për shpërndarjen e rrymës do të vendosen në autostradë.
“Ne i kemi pas të sëmurë nga COVID-19 dy elektricistët tanë, mirë jemi ka punojmë sepse nëse e dini autostrada ka qenë e dëmtuar shumë, 14 trafo të mëdha, 54 ormana për shpërndarje të rrymës, 110 mijë metër kabllo do të vendosen në autostradë”, ka thënë në fund ai për Metron.
Projekti i kësaj autostrade është një ndër investimet më të mëdha që ka bërë Kosova deri më tani. Në të janë investuar afër 1 miliard euro.
Kjo rrugë është e një rëndësie të madhe, pasi e lidh Kosovën me Shqipërinë dhe qarkullimi në këto dy shtete është më i lehtë dhe më i shpejtë.
Metro ka raportuar për mungesë të ndriçimit në autostradë edhe dy vite më herët. /Botapress.info/
