Ambasada e Shteteve të Bashkuara të Amerikës në Ukrainë u bëri thirrje qytetarëve amerikanë në Ukrainë që të konsiderojnë nisjen tani, duke thënë se situata e sigurisë në vend ishte “e paparashikueshme për shkak të rritjes së kërcënimit të veprimeve ushtarake ruse”.
Situata e sigurisë në Ukrainë “mund të përkeqësohet me pak njoftim”, tha ambasada në faqen e saj të internetit të mërkurën, shkruan Reuters.
Në fillim të kësaj jave, Shtetet e Bashkuara u bënë thirrje qytetarëve të saj të mos udhëtojnë në Ukrainë.
Presidenti i SHBA-ve, Joe Biden, tha të martën se sanksionet personale ndaj presidentit rus Vladimir Putin, megjithëse një hap i rrallë, mund të konsiderohen si pjesë e një përpjekjeje nga Uashingtoni dhe aleatët e tij për të bindur Moskën se çdo agresion i ri kundër Ukrainës do të kishte kosto të shpejta dhe masive.
Rusia paralajmëroi të mërkurën se vendosja e sanksioneve ndaj Putinit personalisht nuk do ta dëmtonte atë, por do të ishte “politikisht shkatërruese”.
Rusia ka mbledhur dhjetëra mijëra trupa pranë kufirit të saj me Ukrainën, por ka mohuar se ka në plan të pushtojë.
Shtetet e Bashkuara kanë kaluar javë të tëra duke u përpjekur të arrijnë marrëveshje me partnerët evropianë për një paketë të fortë sanksionesh nëse Rusia sulmon.
