Kryetari i Shoqatës së Naftëtarëve: Nëse situata mbetet e qetë, çmimet mund të bien gradualisht

Fadil Berjani, kryetar i Shoqatës së Naftëtarëve të Kosovës, ka komentuar rënien e çmimeve të naftës në tregjet ndërkombëtare, duke theksuar se kjo “mund të jetë një reagim afatshkurtër”.

Ai shkroi në Facebook se rihapja e Ngushticës së Hormuzit – që lidh Gjirin Persik me Gjirin e Omanit – ka sjellë “pak qetësi në tregjet e naftës”.

“Armëpushimi i fundit në mes të SHBA-ve dhe Iranit, dhe rihapja e Ngushticës së Hormuzit kanë sjellë pak qetësi në tregjet e naftës. Frika për ndërprerje të furnizimit është ulur dhe kjo u reflektua menjëherë në çmime, me indekse si USOIL dhe Brent që panë një stabilizim në orët e fundit. Megjithatë, kjo mund të jetë një reagim afatshkurtër,” shkroi Berjani.

Ai shtoi se nëse situata mbetet e qetë, “çmimet mund të vazhdojnë të bien gradualisht”.

“Vetëm një marrëveshje e qëndrueshme dhe afatgjatë do të sillte stabilizim të vërtetë për tregjet e naftës, edhe në Kosovë.”