Qeveria e Kosovës sot ka njoftuar se ka hapur Fondin për Siguri, ku qytetarët mund të dhurojnë donacione në mënyrë që ato mjete të përdoren për sigurinë shtetërore.
Pas njoftimit të qeverisë, kryetari i Komunës së Suharekës, Bali Muharremaj, ka bërë të ditur se rrogën e tij të muajit shkurt do ta kalojë në këtë fond.
“Si ushtarak me profesion, por edhe si ish-pjesëtar i UÇK-së, e konsideroj se është momenti i duhur ta ndihmojmë avancimin e ushtrisë sonë, pra Forcës së Sigurisë së Kosovës”, ka shkruar Muharremaj.
Muharremaj ju ka bërë thirrje edhe deputetëve, ministrave dhe udhëheqësve të dikastereve të tjera që t’i ndajnë të ardhurat e tyre për sigurinë e vendit.
“Megjithëse qytetarët tanë po përballen edhe me rritje çmimesh, si në energji elektrike e shumë të tjera, le ta bartim më shumë ne udhëheqësit peshën e kësaj situate”, ka thënë ai.