Kriza në Hormuz godet Irakun, eksporton vetëm 10 milionë fuçi naftë

Konflikti në Iran dhe mbyllja e Ngushticës së Hormuzit po vazhdojnë të shkaktojnë tronditje në tregun global të energjisë, ndërsa Iraku ka regjistruar rënie drastike të eksporteve të naftës gjatë muajit prill.

Ministri i ri i Naftës në Irak, Bassim Mohammed, bëri të ditur se vendi ka arritur të eksportojë vetëm 10 milionë fuçi naftë përmes Hormuzit, krahasuar me rreth 93 milionë fuçi që eksportoheshin zakonisht çdo muaj para nisjes së luftës në Iran.

Situata ka ndikuar rëndë edhe te eksportuesit e tjerë të mëdhenj të Gjirit Persik, përfshirë Arabinë Saudite, Emiratet e Bashkuara Arabe dhe Kuvajtin, duke nxitur rritje të ndjeshme të çmimeve të naftës në tregjet ndërkombëtare.

Në përpjekje për të zbutur pasojat e krizës, Iraku ka rifilluar eksportet përmes tubacionit Kirkuk-Ceyhan, pas marrëveshjes së arritur ndërmjet qeverisë në Bagdad dhe autoriteteve të Kurdistanit irakian.

Sipas Mohammedit, aktualisht po eksportohen rreth 200 mijë fuçi në ditë përmes portit turk të Ceyhanit, ndërsa autoritetet synojnë që kjo sasi të rritet në 500 mijë fuçi në periudhën e ardhshme.

Ministri theksoi se Iraku po koordinon veprimet me vendet e OPEC-ut për të rritur prodhimin dhe për të kompensuar humbjet e shkaktuara nga bllokimi i rrugëve detare. Objektivi afatmesëm i Bagdadit mbetet prodhimi prej 5 milionë fuçish naftë në ditë.