Konfirmohet rasti i parë i sëmundjes “Lija e Deleve/Dhive” në Kosovë

Ministria e Bujqësisë, Pylltarisë dhe Zhvillimit Rural, përmes Agjencisë së Ushqimit dhe Veterinarisë (AUV), ka njoftuar se është konfirmuar rasti i parë i sëmundjes Lija e Delve/Dhive (Sheep Pox/Goat Pox) në fshatin Sazli, Komuna e Ferizajt.

Pas hulumtimeve diagnostike në terren dhe zbatimit të masave për kontrollin e sëmundjes, në mostrat e testuara në Laboratorin e Ushqimit dhe Veterinarisë është konfirmuar rasti i parë i sëmundjes Lija e Dhenve në një fermë të deleve në këtë fshat.

Agjencia e Ushqimit dhe Veterinarisë ka bërë të ditur se ka vendosur masa të përgjithshme për kontrollin, parandalimin dhe luftimin e sëmundjes Lija e Deleve/Dhive, të cilat do të zbatohen në rajonin e Ferizajt dhe Gjilanit, varësisht nga situata epidemiologjike.

Sipas vendimit, ndalohet lëvizja e deleve dhe dhive nga fermat, si dhe tregtimi i tyre në tregje dhe shitblerja.

Fermat ku është konfirmuar prezenca e sëmundjes vendosen në izolim/karantinë të plotë, duke u ndaluar çdo hyrje-dalje.

Fermerët obligohen që për çdo ndryshim të gjendjes shëndetësore të kafshëve të njoftojnë menjëherë veterinarin, ndërsa praktikat veterinare duhet të zbatojnë protokollet përkatëse për parandalimin dhe luftimin e sëmundjes.

Gjithashtu, fermerët janë të obliguar të zbatojnë masa të biosigurisë në fermat e tyre, ndërsa komunat duhet të përcaktojnë lokacionet për groposjen e kafshëve të ngordhura.

AUV do të vazhdojë me hulumtimin epidemiologjik, marrjen e mostrave dhe testimet laboratorike.

Përjashtimisht, nga masat e përgjithshme, lejohet lëvizja e kafshëve nga fermat e lira nga sëmundja deri në thertore të licencuara, me pëlqim paraprak të inspektorit veterinar të AUV-së.

Po ashtu, u është urdhëruar menaxherëve të tregjeve të pezullojnë punën për tregtimin e kafshëve të imta (dele dhe dhi) nga momenti i hyrjes në fuqi të vendimit.

Në zbatimin e këtyre masave janë të obliguara Policia e Kosovës dhe organet komunale, në koordinim me AUV-në.