Komentohet thirrja e Kurtit për bashkëpunim mes “ambicieve” për një mandat të radhës

Ditë më parë, Lëvizja Vetëvendosje zhvilloi Mbledhjen e LVI të Këshillit të Përgjithshëm.

Meqë po shkojmë edhe drejt zgjedhjeve dhe partitë politike kanë nisur angazhimet e tyre, në atë mbledhje temë ishin edhe zgjedhjet e ardhshme nacionale.

Nga fjalimi i gjatë i kryeministrit Albin Kurti, ai përmendi edhe një çështje tjetër. Kurti i këshilloi anëtarët e VV-së që të mos bëjnë garë mes vete gjatë zgjedhjeve.

“Duhet të kuptojmë që gara me njëri-tjetrin është produkt i ndasive që і nxitin të tjerët. Ajo nuk na shërben neve dhe nuk i shërben qytetarëve. Stoiket e kanë vënë re qysh në kohërat antike që gara e vetme qe duhet ta kemi është ajo me vetveten, natyrisht vetëm nëse përmirësimi dhe progresi janë qëllimet tona” tha Kurti.

Ditë më parë Lëvizjes Vetëvendosje iu larguan dy deputetë. Eman Rrahmani dhe Visar Korencia kanë ndarë rrugët me Kurtin duke iu bashkuar “Listës për familjen”

Batusha: Nuk ka të bëjë me përçarje

Agon Batusha, deputet i Lëvizjes Vetëvendosje

Foto galeri

Por, pavarësisht kësaj, deputeti i Lëvizjes Vetëvendosje, Agon Batusha, në një përgjigje të shkurt për “Bota sot”, thotë se nuk ka përçarje mes anëtarëve të VV-së.

Ai tha se këshilla e kryeministrit Kurti është e bazuar në vlerat dhe parimet e VV-së.

“Nuk ka të bëjë me përçarje. Janë porosi të kryetarit dhe kryeministrit të bazuara në vlerat dhe parimet e VV-së. Synimet tona elektorale janë të qarta, andaj duhet së bashku si aktivist të bëjmë më të mirën që mesazhi ynë të shkoj tek secili qytetarë”, ka thënë deputeti i LVV-së, Batusha.

Ahmeti: Thirrja e Kurtit është e arsyeshme, por ndoshta  e vonuar

Hidajet Ahmeti, analist

Foto galeri

Kurse, analisti Hidajet Ahmeti këtë e sheh si të natyrshme për një parti që siç thotë ai i ka fituar 50% të votave.

Sipas tij, me afrimin e zgjedhjeve, shtohen edhe ambiciet.

“Është shumë e natyrshme të krijohen ndasi e përçarje në një subjekt që ka fituar mbi 50% të votave, pasi rriten ambiciet e anëtarëve të saj. Por është akoma më prezente kjo frymë, kur sondazhet e fundit e nxjerrin Vetëvendosjen si subjektin e parë, me diferencë shumë të madhe nga subjekti i dytë. Tash kur zgjedhjet po afrohen, entuziazmi akoma më shumë rritet, ambiciet shtohen e problemet e brendshme thellohen”, thotë ai.

Tutje, ai shprehet se kjo mund të rregullohet me rregulla të brendshme dhe ambiciet mund të shuhen, sepse rregullat e lojës nuk do t’i lejojnë.

“Thirrja e Kurtit është e arsyeshme, por ndoshta e vonuar. Për një subjekt që thirret në demokraci të brendshme, duhet vlerësuar edhe zërat ndryshe dhe secili anëtarë në bazë të rregullave duhet t’i jepet mundësia të kaloj nëpër filtrat e përcaktuar me rregullim të brendshëm, por është më se normale që ambiciet e sëmura të shuhen, pasi rregullat e lojës nuk do t’i lejojnë”, përfundon ai