Irani: Zona rreth centralit bërthamor është goditur për herë të katërt

Zona përreth centralit bërthamor në Bushehr është sulmuar sot për herë të katërt gjatë luftës aktuale, sipas Organizatës së Energjisë Atomike të Iranit.

Organizata njofton se një nga punonjësit e mbrojtjes fizike të centralit është vrarë në sulm dhe akuzon SHBA-në dhe Izraelin për përgjegjësi.

SHBA-ja dhe Izraeli nuk e kanë konfirmuar sulmin.

Në deklaratë thuhet se hetimet fillestare sugjerojnë se incidenti “nuk ka shkaktuar dëme” në pjesët kryesore të centralit dhe funksionimi i tij “nuk është prekur”. Megjithatë, paralajmërohet se për shkak të “sasisë së konsiderueshme të materialit radioaktiv”, çdo dëmtim serioz mund të rrezikojë një “aksident të madh bërthamor”

Bushehr është centrali i vetëm bërthamor funksional i Iranit dhe është ndërtuar me ndihmën e Rusisë.

Moska ka evakuuar një pjesë të madhe të stafit të saj nga centrali. Kreu i korporatës shtetërore bërthamore ruse, Rosatom, Alexei Likhachev, ka deklaruar dy ditë më parë se një “valë përfundimtare evakuimi”, që përfshin rreth 200 persona, pritet të zhvillohet javën e ardhshme.

Programi bërthamor i Iranit ka qenë prej kohësh një pikë përplasjesh, duke çuar në sanksione të gjera ndërkombëtare. Lufta SHBA-Izrael me Iranin ka nisur më 28 shkurt, dy ditë pas raundit të tretë të bisedimeve indirekte bërthamore SHBA-Iran në Gjenevë.