Ushtruesi i detyrës së kryetarit të PDK-së, Enver Hoxhaj ka takuar në Prishtinë zëvendës ndihmës sekretarin amerikan të shtetit, Matthew Palmer dhe ambasadorin e SHBA-së në Kosovë, Phlilip Kosnett.
Në këtë takim është biseduar për të ardhmen e dialogut Kosovë-Serbi, pritjet nga ky proces të PDK-së që duhet të përfundojnë me njohjen e ndërsjelltë, rolin opozitar të partisë në jetën politike të vendit si dhe tema të tjera me interes për vendin.
Hoxhaj ka sqaruar pozicionin e PDK-së në raport me zhvillimet politike, dhe ka kërkuar një rol më të madh dhe të drejtpërdrejt të Shtetetve të Bashkuara të Amerikës në dialog si partner strategjik i Kosovës.Ka filluar takimi i të dërguarit special të SHBA-së për dialogun Kosovë-Serbi, Matthew Palmer, me ushtruesin e detyrës së PDK-së, partisë më të madhe opozitare në Kuvendin e Kosovës.
Mësohet se takimi është duke u mbajtur në Ambasadën e Shteteve të Bashkuara të Amerikës në Prishtinë.
Palmer ka arritur në Kosovë për një vizitë tre-ditore që në fokus do të ketë dialogun e Kosovës me Serbinë. Këtë javë në Kosovë do të qëndrojë edhe Miroslav Lajçak, i dërguari special i BE-së për dialogun e Kosovës me Serbinë. Së bashku, këta të dy do të angazhohen në rinisjen e dialogut dhe arritjen e marrëveshjes së paqes mes Kosovës dhe Serbisë.
Zëvendës Ndihmës Sekretari Amerikan i Shtetit për Evropën, Matthew Palmer dhe i dërguari i posaçëm i Bashkimit Evropian për dialogun Kosovë – Serbi, Miroslav Lajçak do të qëndrojnë sot në Kosovë, në kuadër të përgatitjeve për rifillimin bisedimeve.
Gjatë vizitës së tij dy-ditore të punës, Palmer dhe Lajçak do të takohen me Presidenten Osmani, Kryeministrin Kurti, Zëvendës Kryeministrin e Parë për Integrim Evropian, Zhvillim dhe Dialog Bislimi, Zëvendës Kryeministren e Dytë dhe Ministren e Punëve të Jashtme dhe Diasporës Gërvalla-Schwarz.
Lajçak gjithashtu do të takohet me komunitetin ndërkombëtar në Kosovë dhe do t’u drejtohet Shefave të Misioneve të BE-së.
Vizita e përbashkët e zotit Palmeri dhe zotit Lajçak shihet si një mesazh i bashkërendimit transatlantik lidhur me bisedimet për normalizimin e marrëdhënieve Kosovë – Serbi, që është kusht për përparimin e të dyja vendeve drejt integrimeve evropiane. Një bashkërendim i tillë ndërmjet Shteteve të Bashkuara dhe Bashkimit Evropian pritet të shtohet me administratën e presidentit amerikan Joe Biden, i cili u ka bërë thirrje Kosovës dhe Serbisë të arrijnë një marrëveshje që do të kishte në qendër njohjen e ndërsjellë.
Rifillimi i dialogut është paralajmëruar për mesin e muajit qershor dhe do të shënojë rastin e parë të takimit të kryeministrit të Kosovës, Albin Kurti me presidentin e Serbisë, Aleksandër Vuçiç./Botapress/
