Haradinaj: Nuk e votuam raportin sepse s’mund ta shkelim Kushtetutën dhe të veprojmë ndryshe

Kryetari i AAK’së, Ramush Haradinaj, ka thënë se sot konstituimin e kuvendit e ka bllokuar kryeministri në detyrë, Albin Kurti.

“Konstituimin e Kuvendit sot e ka bllokuar vetë Albin Kurti. Ligji e Kushtetuta e këtij shteti nuk lejojnë që të mbash edhe postin e Kryeministrit apo të Ministrit dhe të betohesh si deputet.”

Ai ka thënë Kurti nuk mund të ulet në dy karrige njëkohësisht, derisa ka shtuar se nuk e votuan raportin për shkak se nuk mund ta shkelim Kushtetutën.

“Nuk mund të ulesh në dy karrige njëkohësisht. Ne nuk mund ta shkelim Kushtetutën dhe të veprojmë ndryshe, prandaj nuk e votuam raportin.”

Haradinaj i ka bërë thirrje Kurtit dhe ministrave që të tërhiqen nga postet ose nga mandatet e deputetit e mos t’i fajësojnë të tjerët.

“Albin Kurti me ministrat e tij, nëse duan ta konstituojnë Kuvendin, le të tërhiqen ose nga postet ministrore, ose nga mandati i deputetit, e të mos i fajësojnë të tjerët për gabimet e veta.”

Sot ka dështuar seanca konstituive e kuvendit pasi nuk ka kaluar raporti i komisionit për verifikimin e mandateve të deputetëve. Kjo pasi PDK, LDK e AAK votuan kundër me arsyetimin se anëtarët e qeverisë që janë zgjedhur deputetë nuk kanë dhënë dorëheqje. /GazetaExpress/