Fuqia shkatërruese e uraganit Milton në tre imazhe

Këto imazhe tregojnë se nga erdhi fuqia e uraganit Milton dhe disa nga rreziqet me të cilat përballen ata që janë në rrugën e tij.

Uragani Milton është një nga stuhitë më të fuqishme të krijuara mbi Atlantik në vitet e fundit.

Qendra Kombëtare e Uraganeve ka paralajmëruar se ai do të arrijë në tokë si një “uragan i madh jashtëzakonisht i rrezikshëm” vonë natën e së mërkurës ose herët të enjten në mëngjes.

Duke sjellë me vete erëra të fuqishme deri në 233 km/h, Milton pritet të shkaktojë përmbytje të shumta, shira të rrëmbyeshëm dhe stuhi në Florida.

Miliona banorë po garojnë për t’u evakuuar, ndërsa stuhia ka zbarkuar në shtetin amerikan.

Më 5 tetor, Uragani Milton filloi jetën si një stuhi tropikale në jugperëndim të Gjirit të Meksikës, shkruan BBC.

Erërat e Miltonit ishin rritur nga 129 në 282 km/h në vetëm 24 orë.

Tani është një nga stuhitë më të shpejta të Atlantikut në histori.

Një uragan formohet kur një shqetësim i motit, si një stuhi, tërheq ajrin e ngrohtë të sipërfaqes nga të gjitha drejtimet.

Uji i detit avullon dhe tërhiqet lart nga erërat konverguese.

Ndërsa ngrihet, avulli i ujit ftohet dhe kondensohet në re dhe shi – dhe më shumë ajër i lagësht i ngrohtë ngrihet nga sipërfaqja për ta zëvendësuar atë.

Dhe oqeane më të ngrohta, do të thotë uragane më ekstreme, paralajmërojnë ekspertët.

Uragani Milton u formua në Gjirin e Meksikës në të njëjtën kohë kur dy uragane të tjera të mëdha po shpërthenin mbi Atlantik.

Uragani Leslie dhe Uragani Kirk formuan një treshe stuhish më 6 tetor, ndërsa Uragani Milton po forcohej.

Është e pazakontë të shohësh tre stuhi që formohen menjëherë në fund të sezonit, theksoi meteorologu Philip Klotzbach i Universitetit Shtetëror të Kolorados.

Në fakt, është hera e parë që ky numër uraganesh është parë njëkohësisht përtej Atlantikut në muajin tetor që nga fillimi i regjistrimeve satelitore në vitin 1966.

Ndryshe, Florida ka ndërmarrë përpjekjen e saj më të madhe të evakuimit në vite, ndërsa ende po përballet me pasojat e uraganit Helene.