E dërguara speciale e Britanisë, flet me Kurtin – ia shpreh shqetësimin për tensionet Kosovë – Serbi

E dërguara speciale e Mbretërisë së Bashkuar për Ballkanin Perëndimor, Karen Pierce, ka zhvilluar një bisedë me kryeministrin në detyrë të Kosovës, Albin Kurti, për të diskutuar tensionet e fundit mes Kosovës dhe Serbisë.

Sipas njoftimit të Ambasadës britanike në Kosovë, Pierce ka ngritur shqetësimin për situatën aktuale dhe ka theksuar rëndësinë e zgjidhjes së çështjeve përmes dialogut të lehtësuar nga Bashkimi Evropian.

“Karen Pierce, e dërguara speciale e Mbretërisë së Bashkuar për Ballkanin Perëndimor, foli sot me kryeministrin në detyrë Kurti për të diskutuar shqetësimet e saj në lidhje me tensionet e fundit mes Kosovës dhe Serbisë, si dhe nevojën për të zgjidhur çështjet e pazgjidhura përmes dialogut të lehtësuar nga BE-ja”, thuhet në njoftim.

Pierce gjithashtu ka njoftuar se pret përfaqësuesit e Kosovës në takimet e Procesit të Berlinit, që do të zhvillohen në tetor në Britani.

Po ashtu, diplomatja britanike do të zhvillojë bisedime edhe me presidentin e Serbisë në ditët në vijim.