Dogana sekuestron telefona të padeklaruar në Prishtinë, u gjetën në një nga bodrumet e një objekti

Dogana e Kosovës ka njoftuar se gjatë një kontrolli në Prishtinë, në një nga bodrumet e një objekti është gjetur një kasafortë e mbuluar me pako, në të cilën pas hapjes janë gjetur një sasi e konsiderueshme telefonash të rinj të padeklaruar.

Në total janë sekuestruar 41 pajisje të reja elektronike, derisa nuk është ofruar asnjë dokumentacion për origjinën e mallit.

“19 copë telefona mobil të mençur SAMSUNG GALAXY A26 5G; 21 copë telefona mobil të mençur SAMSUNG GALAXY A16; 1 copë tablet SAMSUNG GALAXY TAB A9+ 5G”, janë pajisjet e sekuestruara sipas njoftimit.

Dogana e Kosovës thotë se do të vazhdojë me procedurat administrative dhe hetimore lidhur me këtë rast.