Pas kthimit nga pushimi i parë, prokurorja Silvia D’ascoli, tha se gjatë seancës private që u zhvillua paraprakisht, kanë mbetur te pika, ku dëshmitari W04674 po përshkruante që gjetën një varr dhe panë dy trupa në të dhe kishte thënë se njërin trup e ka njohur, kurse tjetrin jo.
Dëshmitari i dhjetë, deklaroi se trupin e parë vetëm e kanë zbuluar dhe kanë vënë re se është i panjohur, ndërkaq për trupin tjetër që kanë parë, ai bëri të ditur se e kanë njohur.
Sa i përket trupit të parë, të cilin nuk e kanë njohur, ai deklaroi se është dukur si zeshkan.
“Nuk mundem me thënë, veç u duke si zeshkan po kish pas filluar me u prish, u duke si zeshkan, fytyrën e gjatë”, tha ky dëshmitar.
Tutje, deklaroi se pasi gjetën këta dy trupa, i kanë mbuluar dhe i kanë lënë ashtu si i kanë gjetur e kanë shkuar në shtëpi.
“Si e kemi gjet, ashtu edhe e kemi lënë”, tha ai, kurse shtoi se herën e dytë që kanë shkuar te varri ka qenë pas dy apo tre ditësh, por se nuk i kujtohet saktë.
Ai tha se herën e dytë kur kanë shkuar e kanë zhvarrosur trupin dhe e kanë vënë në traktor.
“Herën e dytë kur kemi shkuar e kemi zhvarros trupin edhe e kemi qit në traktor e kemi pru prej shpisë”, ka thënë ky dëshmitar.
Kurse, trupin tjetër, ai deklaroi se vetëm e kanë mbuluar me dhe.
“Trupin tjetër veç e kemi mbuluar me dhe edhe qaty ka mbetë”, ka thënë ai.
Më pas, është kaluar sërish në seancë private, ku prokurorja D’ascoli do të vazhdojë marrjen në pyetje të dëshmitarit.
Në gjykatoren e Dhomave të Specializuara të Kosovës (DhSK), të hënën ka filluar dëshminë e tij, dëshmitari i dhjetë në gjykimin për krime lufte që po zhvillohet ndaj Salih Mustafës në Hagë.
Edhe ky dëshmitar, si gjithë dëshmitarët e tjerë në këtë gjykim po deklarohet nën masa mbrojtëse, si shtrembërimi i zërit dhe fytyrës.
betimiperdrejtesi