Burim Ramadani premton strehimore për çdo komunë

Burim Ramadani, kandidati i AAK-së për zgjedhjet e 27 dhjetorit, ka prezantuar një prej zotimeve kryesore të tij në fushatë. Krijimin e strehimoreve të sigurisë në çdo komunë të Kosovës për raste krizash.

“Do të veprojmë me urgjencë për t’i dalë në krah popullit në raste krizash. Në nivel të Ministrisë së Mbrojtjes, Ministrisë së Punëve të Brendshme, Agjencisë së Menaxhimit Emergjent, komunave dhe institucioneve tjera do të hartojmë plan specifik. Strehimore në çdo komunë të Kosovës’, shkruan Ramadani.

Në kuadër të këtij projekti, sipas tij, do të bëhet identifikimi i të gjitha bodrumeve dhe hapësirave publike e private që mund të përshtaten dhe shndërrohen në strehimore funksionale. Sipas Ramadanit, këto hapësira do të shërbejnë si vendstrehime të sigurisë për qytetarët në situata emergjente.