“Blerje klasike e votës” – “gozhdohet” ashpër Qeveria në detyrë për ndarjen e 100 eurove

Në prag të zgjedhjeve, Qeveria në detyrë dje ka rritur pagesat për gratë lehona dhe ka ndarë nga 100 euro për pensionistët, fëmijët, studentët dhe punëtorët e sektorit privat.

Kryeministri në detyrë Albin Kurti ka bërë me dije se kjo është paraparë në Pakon për përballje me inflacionin 2.0, e cila është miratuar në mbledhjen e sotme të Qeverisë.

Në adresimin e tij para kabinetit qeveritar, ai e ka thënë se Qeveria asnjëherë nuk do t’i lerë vetëm qytetarët.

“Prandaj sot kam kënaqësinë të ju njofoj për pakon për përballjen me inflacionin 2.0, të cilën e kemi dizajnuar dhe do ta miratojmë sot me masat si në vijim: mbështetjeje e njëhershme prej 100 euro për pensionistët, mbështetje e njëhershme prej 100 euro për fëmijë, mbështetej e njëhershme prej 100 euro për punonjësit e sektorit jo publik, mbështesje e njëhershme prej 100 eurosh për studentet aktiv”, ka thënë Kurti.

Ky vendim ka nxitur reagime të shumta.

Në reagimin e tij të premten, kryetari i Lidhjes Demokratike të Kosovës, Lumir Abdixhiku, tha se Vetëvendosje po përdor çdo mjet të mundshëm për të qëndruar me çdo çmim në pushtet.

“Kjo nuk është pako e inflacionit. Kjo është pako e tentimit për blerje vote. Një përpjekje e vonshme për të mbuluar dështimin qeverisës me paranë e vet qytetarëve. Një ofendim zgjedhor për dinjitetin dhe nevojat reale të njerëzve të vendit, të atyre që i lë si të parafundit në Evropë. Të parafundit! Populli i Kosovës nuk blihet”, deklaroi Abdixhiku.

Ish-deputeti i PDK-së, Artan Behrami, e ka vlerësuar si vepër penale këtë ndarje të mjeteve dhe i ka kërkuar Prokurorisë që të nisë hetime.

“Prokuroria duhet tani të zbarkojë në Qeverinë e Kosovës. Kjo është blerje klasike e votës, është ndikim i drejtpërdrejtë te votuesit. Sipas Kodit Penal të Kosovës: “keqpërdorimi i varësisë ekonomike/profesionale ndikon te votuesi për të votuar në një mënyrë të caktuar ose të mos votojë, dënohet me 1 deri në 5 vjet burgim””, ka theksuar Behrami.

Ndërkaq Oda Ekonomike Amerikane ka shprehur shqetësim se me masat që ka marrë Qeveria ofrohen lehtësira afatshkurtra por nuk adresohen faktorët e nevojshëm strukturorë për zhvillim të qëndrueshëm ekonomik.

“Në vend të pagesave të përkohshme dhe të njëhershme, fokusi duhet të zhvendoset drejt investimeve në infrastrukturë dhe në politika që forcojnë ekosistemin e sektorit privat”, ka vlerësuar Oda Ekonomike.

Edhe vjet, 3 ditë para rundit të dytë të zgjedhjeve lokale, Qeveria pati ekzekutuar 100 euro për grupin e parë të studentëve.

Ndërkaq 4 ditë para zgjedhjeve parlamentare të 28 dhjetorit, pati ekzekutuar 100 euro për grupin e dytë të studentëve.

E një ditë pas, kryeministri Albin Kurti, e pati dhënë paralajmërimin se në ditën e parë pas zgjedhjeve do të ndajë nga 100 euro për fëmijë dhe pensionistë.