​BDI në takim me kongresmenin Keith: Marrëveshja e Ohrit po rrezikohet

Delegacioni i Bashkimit Demokratik për Integrim (BDI), i kryesuar nga Ali Ahmeti, ka zhvilluar një takim me kongresistin amerikan Keith Self, kryetar i Nënkomisionit për Evropën në Kongresin Amerikan.

Në takim u diskutua për zhvillimet politike në Maqedoninë e Veriut, si dhe sfidat që lidhen me zbatimin e Marrëveshjes së Ohrit.

U theksua rëndësia e ruajtjes së Marrëveshjes Paqësore të Ohrit, e cila u vlerësua si themel i paqes, bashkëjetesës dhe demokracisë multietnike në Maqedoninë e Veriut, si dhe si një nga investimet më të rëndësishme strategjike të Shteteve të Bashkuara të Amerikës në rajon.

Kryetari i BDI-së, Ali Ahmeti, shprehu mirënjohje për mbështetjen e vazhdueshme amerikane ndaj stabilitetit, sigurisë dhe orientimit euro-atlantik të Maqedonisë së Veriut dhe Ballkanit Perëndimor.

Në takim mori pjesë edhe Ziadin Sela, i cili përmes një postimi në Facebook tha se me kongresistin amerikan është diskutuar për, siç u shpreh ai, regresin e fundit në disa fusha në Maqedoninë e Veriut, si dhe për sfidat që lidhen me të drejtat e shqiptarëve.

Sela ngriti shqetësime për tendencat lidhur me përdorimin zyrtar të gjuhës shqipe dhe nevojën e vendosjes së parimit të Badenterit në Gjykatën Kushtetuese, si mekanizëm mbrojtës ndaj majorizimit.

Ai po ashtu përmendi rastin “Alfa”, duke shprehur shqetësime për funksionimin e sistemit të drejtësisë në vend.

Sipas Selës, në takim është diskutuar edhe për, siç tha ai, cenimin e vazhdueshëm të të drejtave të shqiptarëve që burojnë nga Marrëveshja e Ohrit.