Konjufca: Kjo qeveri po synohet me u rrëzu me presidentin

Ministri i Jashtëm, Glauk Konjufca, në seancën e thirrur për presidentin ku të pranishme nuk janë partitë kryesore opozitare, tha se për 7 vjet ndodhën 3 kriza politike në Kosovë, që sipas tij, “ishin përpjekje e opozitës me rrëzu Qeverinë Kurti”. Konjufca tha se “kjo qeveri, po synohet me u rrëzu me presidentin”.

Konjufca në foltore të Kuvendit tha: “3 kriza na kanë ndodhë në katër palë zgjedhje për 7 vjet, tri krizat e kanë pas arsye themelore përpjekjen për mospranim të rezultatit zgjedhor, ose përpjekje për përmbysje të rezultatit zgjedhor”.

“Kriza e vitit 2020 e ka pas formën e daljes së LDK-së nga koalicioni… pra mospajtimin që kryeministër me qenë Kurti dhe mospajtim pse populli ja ka dhanë mandatin VV-së”, tha ai.

Konjufca, si krizë të dytë, përmendi edhe bllokadën e vitit të kaluar, që sipas tij nga kriza e dytë u pamundësua vetëkrijimi i qeverisë.

“Kriza e tretë është kjo që po e kalojmë tash, bashkimi i opozitës me shfrytëzu çështjen e presisidentit që përmes pamundësimit të kuorumit të çojnë në zgjedhje”.

Sipas tij, kjo po bëhet me “rrëzu qeverinë”.