Humb jetën gruaja që u aksidentua ditë më parë në Jabllanicë të Leshanit

Ka vdekur gruaja e cila kishte pësuar lëndime të rënda trupore në aksidentin e trafikut që ndodhi disa ditë më parë në rrugën Pejë–Klinë, në fshatin Jabllanicë e Leshanit.

Pavarësisht përpjekjeve të stafit mjekësor, ajo humbi jetën në orët e hershme të mëngjesit.

Rastin e ka konfirmuar zëdhënësi i Policisë për rajonin e Pejës, Fadil Gashi.

“Ka qenë duke u trajtuar në spitalin e Pejës. Sot në orët e mëngjesit jemi njoftuar se personi në fjalë ka ndërruar jetë. Trupi i pajetë i viktimës është dërguar në Institutin e Mjekësisë Ligjore për obduksion. Rasti po hetohet”, ka deklaruar Gashi për lajmi.net.

Autoritetet kompetente po vazhdojnë hetimet për të sqaruar të gjitha rrethanat që çuan në aksidentin.