Vizitë në Komunën e Drenasit, simbol i rezistencës dhe krenarisë kombëtare

Kandidati për deputet nga radhët e Partisë Demokratike të Kosovës, Rrahman Rama, ka vizituar sot Komunën e Drenasit, duke e vlerësuar atë si një simbol të sakrificës dhe krenarisë kombëtare.

Në këtë vizitë, ai ka theksuar punën e jashtëzakonshme të kryetarit të komunës, Ramiz Lladrovci, veteran i Ushtrisë Çlirimtare të Kosovës dhe vëllai i heroit kombëtar Fehmi Lladrovci. Duke përmendur faktin se Drenasi gjashtë herë është shpallur komuna me performancën më të mirë, Rrahman Rama u shpreh krenar për arritjet e saj:

“Kjo komunë, me përkushtimin dhe udhëheqjen e Ramizit, është një shembull frymëzimi për të gjithë ne.”

Rama nderoi kujtimin e heronjve Fehmi dhe Xhevë Lladrovci, duke i cilësuar ata si emblema të lirisë sonë:

“Sakrifica e tyre sublime dhe lufta heroike do të mbeten gjithmonë frymëzim për ndërtimin e një Kosove më të sigurt, më të drejtë dhe më të zhvilluar.”

Në përmbyllje, Rrahman Rama ftoi qytetarët që në zgjedhjet e 9 shkurtit të mbështesin Partinë Demokratike të Kosovës dhe vizionin e saj për të ardhmen, duke votuar numrin 131.