Vetëm 3 muaj pas emërimit, shkarkohet ambasadori në Misionin e Posaçëm në Vatikan, Vehbi Miftari

Pushteti i VV-së i udhëhequr nga kryeministri në detyrë, Albin Kurti, ka filluar “fshesën” në diplomaci. Sot ka nisur shkarkimin e ambasadorëve që janë emëruar më parë, raporton Gazeta Sinjali.

Siç merr vesh Gazeta Sinjali, i pari ambasador i shkarkuar është Vehbi Miftari.

Ky i fundit, konfimrojnë burimet e Gazetës Sinjali, është shkarkuar sot nga detyra e tij si ambasador në Misionin e Posaçëm në Vatikan.

Dhe kjo vetë 3 muaj pas emërimit të tij në këtë pozitë, pasi Miftari më 26 janar të vitit 2024, ishte emëruar udhëheqës i misionit të Kosovës në Selinë e Shenjtë.

Deri në atë kohë, Miftari, kishte shërbyer si këshilltar i presidentes Vjosa Osmani.

“Sot, pas tri vjetësh pune si këshilltar politik i Presidentes Vjosa Osmani, e përmbylla angazhimin tim në Zyrën e Presidentes së Kosovës. Ka qenë përvojë fort e vyer në shërbim të Republikës. E falënderova Presidenten për bashkëpunimin e deritashëm dhe për besimin, të cilin ajo dhe institucionet e tjera të vendit ma kanë dhënë, për ta udhëhequr misionin e sapothemeluar të Kosovës në Selinë e Shenjtë/Vatikan”, kishte shkruar Miftari në profilin e tij në Facebook, pasi ishte emëruar si ambasador nga presidentja Vjosa Osmani.

Ky emërim ishte bërë pak kohë pasi Osmani kishte njoftuar për hapjen e këtij misioni.

Më 12 janar, Vjosa Osmani kishte njoftuar se ka dekretuar hapjen e Misionit të posaçëm të Kosovës në Vatikan.

Aso kohe Osmani kishte vlerësuar se njohja e Kosovës nga Selia e Shenjtë do të ndikonte në fuqizimin e mëtejmë të shtetësisë së Kosovës dhe në procesin e integrimin të vendit në strukturat euro-atlantike.

Ligji për Shërbimin e Jashtëm tregon për roli e misioneve të posaçme.

“Mision i përkohshëm, që përfaqëson Republikën e Kosovës në një shtet tjetër ose organizatë ndërkombëtare, me pëlqimin e tyre, për të negociuar ose kryer detyra të posaçme, të cilat janë në interes të Republikës së Kosovës”, thuhet në ligj.