Vendos Gjykata: 30 ditë paraburgim ndaj Agim Rexhepit, i dyshuar për krim të organizuar dhe shpërlarje parash

Gjyqtari i procedurës paraprake pranë Gjykatës Themelore në Prishtinë, Departamenti Special, ka caktuar masën e paraburgimit për 30 ditë ndaj Agim Rexhepit i dyshuar për krim të organizuar në lidhje me shitblerjen e narkotikëve në aksionin e njohur si “Qielli i thyer”.

Lajmi është konfirmuar nga udhëheqësja e zyrës për informim, Mirlinda Gashi.

Prokuroria Speciale e Kosovës ka njoftuar se Rexhepi është duke u hetuar edhe për “Shpëlarje të parave”.

“A.R. është arrestuar nën dyshimet për veprat penale ‘Pjesëmarrja ose organizimi i grupit kriminal të organizuar’, lidhur me veprën penale ‘Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge’. PSRK është duke e hetuar gjithashtu A.R. për veprën penale ‘Shpërlarja e parave’ në lidhje me trafikimin e narkotikëve dhe pastrimin e parave,” thuhet në njoftimin e PSRK-së.