Tym e flakë para Parlamentit, opozita e rrethon me goma dhe u vë zjarrin

Thirrjet për një tubim masiv të bëra nga kreu i Grupit Parlamentar të PD, Gazment Bardhi duket se janë dëgjuar nga demokratët, të cilët kanë zbritur në sheshin para Parlamentit për të protestuar pas publikimit të investigimit nga Rai 3 për lidhjet e kryeministrit Edi Rama me krimin.

Ashtu siç edhe pritej, opozitarët kanë përgatitur një skenar të ngjashëm me protestat e përjavshme para Bashkisë së Tiranës. Ata mbajnë në duar pankarta me titujt e të gjitha raportimeve të mediave të huaja ndër vite për lidhjet e qeverisë Rama me bandat dhe zyrtarët e korruptuar.

Ndërkohë që policia ka marrë masa duke pajisur efektivët që kanë formuar kordonin me fikëse zjarri dhe maska kundra gaz, duke i paraprirë hedhjes së mundshme të molotovit protestuesit e kanë rrethuar hyrjen e Parlamentit me goma, të cilave u është vënë edhe zjarri.

Disa grumbuj me goma janë duke u djegur, duke krijuar re të dendura tymi. Mbi gomat të cilat po digjen ishin vendosur pankarta me fytyrën e ministrit të Brendshëm Taulant Balla, ish-ministrave Fatmir Xhafaj, Mimi Kodheli, Olta Xhaçka apo sekretarit të Këshilit të Ministrave, Engjëll Agaçi dhe ish-shefit të Operacionales, Oltion Bistri, i cili u arrestua nga SPAK dhe iu sekuestrua pasuri me vlerë mbi 3 milionë euro.

Protestuesit po ashtu kanë hedhur molotov, por deri më tani nuk janë shënuar përplasje me policinë, e cila ka ngritur kordonin në derën hyrëse të Parlamentit.