Trump përmend sërish Kosovën e Serbinë: Askush s’ka bërë diçka të ngjashme

Presidenti amerikan, Donald Trump, sërish ka përmendur Kosovën dhe Serbinë, derisa po fliste për shtetet ku zgjidhi konflikte. Këto deklarata, ai i bëri në një konferencë për media në margjina të Samitit të NATO-s që po mbahet në Hagë.

Trump u pyet mbi presidentin rus, Vladimir Putin dhe shqetësimet se ai ka ambicie territoriale përtej Ukrainës.

Presidenti i Shteteve të Bashkuara tha se një gjë e tillë “është e mundur”, derisa vijoi t’i përmendte konfliktet që sipas tij, tashmë janë zgjidhur.

“E mundur, është e mundur. E di një gjë, ai do të dëshironte të zgjidhej. Do të dëshironte që të dilte nga kjo gjë, është një rrëmujë për të. Ai thirri, tha a mund t’ju ndihmojmë me Iranin? I thash jo, mund të më ndihmoni me Rusinë.

Në javët e fundit në u kujdesëm për Indinë dhe Pakistanin, Kosovën dhe Serbinë, Kongo po vjen, Rwanda po vjen.

Kjo ishte një luftë e madhe… kokë të prera në të gjithë Afrikën. Askush nuk ka bërë kurrë diçka të ngjashme. E konsideroj atë një person që mendoj se është drejtuar gabimisht. Jam shumë i befasuar. Mendova që këtë do ta zgjidhnim” – tha ai, transmeton Nacionale.

Tutje, Trump shtoi se mendon që do të zgjidhet edhe situata në konfliktit Rusi-Ukrainë.

“Ai tha se do të dëshironte të na ndihmonte për një zgjidhje, dhe unë i thash jo jo, më ndihmo të bëj një zgjidhje me ty, me Rusinë, dhe mendoj që do ta bëjmë këtë” – tha presidenti amerikan.

Theksojmë se deklarata të ngjashme, presidenti amerikan bëri edhe gjatë kësaj fundjave. Kur përmendi Kosovën e Serbinë, ai tha se “e sollën edhe këtë në një përfundim”.

“Siç e dini kemi bërë një punë shumë të mirë me Indinë dhe Pakistanin, duket se do të bëjmë marrëveshje tregtie me Indinë dhe Pakistanin.

Është një gjë e mirë ta shohësh.

Njëjtë edhe me Kosovën e Serbinë, kanë luftuar për vite, dhe si e dini e sollëm edhe atë në një përfundim” – u shpreh ai, transmeton Nacionale.

Tutje, Trump ka thënë se duhet të marrë Çmimin Nobel për Paqe rreth këtyre marrëveshjeve, por nuk ia japin pasi “e marrin vetëm liberalët”.

“Duhet të më japin çmimin Nobel për Rwanda, dhe a e keni parë Kongon? Mund të thoni për Kosovën, Serbinë, shumë. E madhja është marrëveshja për Indinë dhe Pakistanin, nuk do të më japin Çmim Nobel për Paqe, sepse ua japin vetëm liberalëve” – tha presidenti amerikan.