Selmanaj merr “dritën jeshile” nga Albin Kurti, ia mësyn garës për Deçanin!

Lëvizja Vetëvendosje ka prezantuar kandidatin e saj për kryetar të Deçanit. Bëhet fjalë për Faton Selmanajn, i cili mori mbështejten e Degës së partisë dhe Albin Kurtit.

Njoftimi i plotë:

Nga tokat pjellore te majat e bjeshkëve, Faton Selmanaj e njeh çdo cep të Deçanit dhe ka vendosur ta kthejë këtë pasuri në zhvillim e mirëqenie për të gjithë.

Në mesin e aktivistëve të qendrës sonë në Deçan dhe me praninë e kryeministrit Albin Kurti dhe sekretarit Alim Rama, u shpall zyrtarisht kandidatura e Faton Selmanajt për kryetar të komunës.

Faton Selmanaj është përfaqësuesi i gjeneratës së re të udhëheqjes – i formuar, i vendosur dhe i përkushtuar për të fuqizuar bujqësinë si motor të ekonomisë lokale, për të zhvilluar turizmin malor e kulturor dhe për të siguruar shërbime publike efikase për të gjithë, pa dallim.

Lëvizja VETËVENDOSJE! hyn në këtë garë me bindjen se Deçani do të jetë shembull i qeverisjes lokale që ecën në hap me zhvillimin shtetëror. Me Faton Selmanajn në krye, kjo komunë do të bëhet partner i fortë i qeverisë qendrore aty ku fjala dhe puna ecin bashkë për të mirën e secilit qytetar.

Më 12 tetor vendosim të çojmë përpara Deçanin – me punë, guxim dhe besim se e ardhmja ndërtohet këtu, së bashku.