Raportimet se u takua me Kurtin, deputetja e LDK-së: Nuk votoj ndryshe nga partia

Deputetja e LDK-së, Serbeze Kabashi-Muçaj, ka dalë me një sqarim publik në profilin e saj në “facebook”, pas raportimeve se është takuar me kryeministrin në detyrë, Albin Kurti. Ajo ka thënë se qëndrimi i saj s’ka ndryshuar dhe se asnjëherë s’do të votojë ndryshe nga ai që do të jetë qëndrimi i LDK-së dhe Grupit Parlamentar, shkruan Express.

“Unë nuk kam dhe nuk do të ushtroj asnjëherë votë individuale për ndonjë parti politike jashtë vullnetit të Grupit Parlamentar të Lidhjes Demokratike të Kosovës”, ka shkruar ajo.

Postimi I plotë:

DEKLARATË PUBLIKE

Për shkak të reagimeve të shumta ku është lakuar emri im në lidhje me Lëvizjen Vetëvendosje, dëshiroj të jem e qartë: qëndrimi im nuk ka ndryshuar.

Unë nuk kam dhe nuk do të ushtroj asnjëherë votë individuale për ndonjë parti politike jashtë vullnetit të Grupit Parlamentar të Lidhjes Demokratike të Kosovës. Vendimmarrja ime është dhe do të mbetet gjithmonë në përputhje të plotë me qëndrimet politike të LDK-së, përfshirë edhe rastet kur diskutohet apo vendoset për ndonjë koalicion të mundshëm.

Jam e vendosur që të përfaqësoj me integritet dhe përgjegjësi besimin që më kanë dhënë qytetarët, dhe kurrë nuk do të veproj në kundërshtim me këtë besim.

Prof. Dr. Serbeze Kabashi – Muçaj

Deputete e Kuvendit të Kosovës, përfaqësuese e LDK-së