PSG nis mbrojtjen e titullit në Ligue 1 me fitore të thellë në udhëtim te Le Havre

Paris Saint-Germain e ka nisur mbrojtjen e titullit me fitore 4-1 në udhëtim te Le Havre.

Kampionët në fuqi të Ligue 1 e nisën shumë mirë ndeshjen, duke realizuar qysh në minutën e tretë.

Goncalo Ramos e gjeti në mënyrë fantastike Lee Kang-In, që shënoi me lehtësi në portën e vendasve.

Me kaq edhe përfundoi pjesa e parë, ndërsa 45 minutat e dytë nisën më furishëm për Le Havre.

Nikoqirët i barazuan shifrat në 1-1 me golin e Gautier Lloris, që realizoi në minutën e 48-të me një asistim të Operi.

Le Havre kishte edhe një gol të anuluar në minutën e 54-të, pasi Casimiri luajti me dorë në ndërtimin e aksionit.

Ousmane Dembele e riktheu epërsinë e PSG-së, duke realizuar në minutën e 85-të, kur u asistua prej transferimit më të ri, Joao Neves për 2-1.

Golin e tretë për parisienët e realizoi Bradley Barcola vetëm pas dy minutash, ndërsa Neves regjistroi edhe asistimin e dytë në debutim.

Randal Kolo Muani e vulosi fitoren e mysafirëve, kur shënoi nga penalltia për 4-1 në minutën e 90-të.

Në xhiron e dytë, PSG do të ketë punë me Montpellier.