Prokuroria Speciale humb betejën me ish-bordin e Ndërmarrjes Publike Banesore

Gjykata e Apelit e Kosovës – Departamenti Special ka refuzuar si të pabazuar ankesën e Prokurorisë Speciale të Republikës së Kosovës ndaj vendimit të Gjykatës Themelore në Prishtinë – Departamenti Special, duke konfirmuar përfundimisht vendimin për hedhjen poshtë të aktakuzës ndaj ish-anëtarëve të bordit të Ndërmarrjes Publike Banesore

Në vendimin e siguruar nga Gazeta Sinjali, thuhet se Apeli ka vërtetuar vendimin e Themelores të datës 22 prill 2025, i cili e kishte cilësuar të pabazuar aktakuzën e ngritur nga Prokuroria Speciale ndaj Hajdar Hoxhës, Lendita Mydermit, Arbnorë Jashanicës, Xhevdet Lecit dhe Bekim Pirevës, për veprat penale të bashkëkryerjes dhe keqpërdorimit të pozitës apo autoritetit zyrtar.

Në të njëjtin rast, janë përfshirë edhe Dren Kukaj, Genc Sherifi dhe Vesel Makolli, të cilët po ashtu akuzoheshin për bashkëkryerje dhe keqpërdorim të pozitës zyrtare, por edhe për lidhje të kontratës së dëmshme.

Gjykata e Apelit vlerësoi se kërkesa e Prokurorisë për vazhdimin e procedurës ishte e pabazuar në prova dhe argumente ligjore.

Vendimi i Apelit mban datën 9 korrik 2025 dhe është nxjerrë nga trupi gjykues i përbërë nga Alferdita Bytyqi (kryetare), Vaton Durguti dhe Ferit Osmani (anëtarë), si dhe bashkëpunëtori profesional Gazmend Ramadani.

Me këtë vendim, Apeli i jep fund procedurës penale ndaj tetë të akuzuarve, duke vërtetuar pafajësinë e tyre pas shqyrtimit fillestar të lëndës.