Prokuroria ngre aktakuzë për mashtrim dhe pastrim parash ndaj katër personave

Prokuroria Themelore në Prishtinë ka ngritur aktakuzë ndaj katër personave nën dyshimet për përfshirje në disa vepra penale të rënda, përfshirë mashtrimin, shmangien nga tatimi, keqpërdorimin e autorizimeve ekonomike dhe pastrimin e parave, shkruan Gazeta Sinjali.

Sipas aktakuzës, të pandehurit G.G dhe T.G akuzohen për veprat penale të “Mashtrimit” (neni 323 paragrafi 4), “Shmangies nga tatimi” (neni 307 paragrafi 3) dhe “Keqpërdorimit të autorizimeve ekonomike” (neni 284 paragrafi 2) të Kodit Penal të Republikës së Kosovës.

Ndërkohë, të pandehurit N.G dhe M.G akuzohen për veprën penale të “Pastrimit të parave” sipas nenit 56 të Ligjit për parandalimin e pastrimit të parave dhe financimit të terrorizmit.

Nga muaji tetor 2020 deri më 16 gusht 2024, G.G dyshohet se ka mashtruar 131 qytetarë përmes premtimeve për ndërtimin e villave nga druri brenda 60 ditëve. Përmes ofertave të rreme dhe kontratave të nënshkruara, ai ka përfituar një shumë të jashtëligjshme prej 1,894,250.00 euro.

Paratë e përfituara, sipas Prokurorisë, janë përdorur për blerjen e pronave që janë regjistruar në emër të tij, të biznesit të tij dhe të bashkëshortes së tij.

Rasti po trajtohet në kuadër të luftës kundër krimit ekonomik dhe do të vazhdohet me procedura gjyqësore për ndriçimin e plotë të veprimtarisë së paligjshme.