Padi ndaj Dimal Bashës për punimin që fliste për lidhje të UÇK-së me trafikimin e drogës

Ish-ushtari i UÇK-së, Agim Pllashniku, përmes përfaqësuesit të tij ligjor, avokatit Gent Gjini ka dorëzuar tashmë në Prokurori padi dhe kallëzim penal ndaj kryeparlamentarit Dimal Basha.

Padia lidhet me pretendimet e Bashës për financimin e Ushtrisë Çlirimtare të Kosovës nga kartelët e drogës dhe për bashkautorësinë e tij për publikimin e këtyre pretendimeve në një revistë shkencore të një universiteti në ShBA.

Basha të mërkurën ka thënë se punimi i tij, i cili siç ka thënë, ishte përfshirë si kapitull në një publikim më të gjerë, është fshirë, ashtu si edhe autorësia e tij në publikimin ku ndër të tjera thuhej se UÇK-ja ishte financuar nga trafikantët e drogës.

Ai ka thënë se ka bërë kërkesë që punimi i tij të hiqej tërësisht nga publikimi dhe se ajo është pranuar.