Osmani thotë se marrëveshjen për Bordin e Paqes që e nënshkroi me Trump do ta dërgojë në Kuvend për ratifikim

Presidentja Vjosa Osmani ka thënë se pas nënshkrimit të Kartës së Bordit të Paqes nga Kosova si anëtare themeluese, kjo marrëveshje do t’i dërgohet Kuvendit të Kosovës për miratim.

Osmani lavdëroi udhëheqjen e SHBA-së dhe tha se kur ajo është në krye “paqja është gjithmonë më e sigurt!”.

“Sot, në Davos, në emër të Republikës së Kosovës, kam nënshkruar Kartën e Bordit të Paqes si anëtare themeluese, e barabartë dhe me të drejta të plota, krah për krah me Shtetet e Bashkuara të Amerikës.  Anëtarësimi në organizata ndërkombëtare të paqes e që udhëhiqen nga aleati ynë strategjik, fuqizon sovranitetin tonë, pozicionin tonë ndërkombëtar, si dhe është në interesin më të lartë të Republikës së Kosovës. Prandaj, kjo marrëveshje historike do t’i dërgohet Kuvendit të Kosovës për ratifikim, në përputhje me kushtetutën e Kosovës, për të marrë miratimin final të përfaqësuesve të popullit”, ka thënë Osmani.

Ajo ka falënderuar presidentin Donald Trump “për lidershipin e tij dhe për ftesën që ta përfaqësoj Republikën e Kosovës në këtë moment historik”.

“Kosova do të jetë në shërbim te paqes, sot e përherë!”.