Osmani nga Babaj i Bokës: FSK është krenaria jonë, e ardhmja euroatlantike

Presidentja e Kosovës, Vjosa Osmani, ka marrë pjesë sot në ushtrimin ushtarak ndërkombëtar DEFENDER Europe 2025, që u zhvillua në Babaj të Bokës, ku ka vlerësuar lart angazhimin dhe profesionalizmin e Forcës së Sigurisë së Kosovës, raporton Gazeta Sinjali.

Përmes një postimi në Facebook, Osmani ka thënë se ndjeu krenarinë që, siç u shpreh ajo, vetëm ushtria e Kosovës mund ta japë.

“Sot në Babaj të Bokës, në zemër të DEFENDER Europe 2025, ndjeva krenarinë që vetëm ushtria e Kosovës mund ta japë”, ka shkruar ajo.

Presidentja, ka falënderuar ushtarët e Kosovës për suksesin e arritur dhe ka përgëzuar aleatët ndërkombëtarë, me theks të veçantë Divizionin e 28-të të Ushtrisë Amerikane, që po udhëheq këtë ushtrim të përbashkët.

“Si Komandante Supreme, pata nderin t’i falënderoj dhe përgëzoj forcat tona për rezultatin e arritur, si dhe aleatët tanë të pathyeshëm, sidomos Divizionin e 28-të të Ushtrisë Amerikane, i cili po e drejton këtë ushtrim historik”, theksoi Osmani.

Ajo tha se ky ushtrim është dëshmi e përkushtimit të Kosovës për të qenë krah për krah me SHBA-në dhe NATO-n, duke përforcuar orientimin euroatlantik të vendit.

“Ky ushtrim është dëshmi se Kosova është e përkushtuar, e aftë dhe e gatshme të qëndrojë krah për krah me SHBA-në dhe NATO-n. FSK është krenaria jonë, Aleanca është forca jonë! E ardhmja jonë është euroatlantike!”, përfundoi Osmani.