Qeveria e Kosovës ka marrë vendim për mosekzekutimin e pagave për muajin shtator për punëtorët grevistë, përkundër faktit që greva në arsim u pezullua dhe procesi mësimor ka nisur të hënën.
Ndëshkimi i grevistëve nga ana e Qeverisë së Kosovës është në kundërshtim me vendimin e Gjykatës Evropiane për të Drejtat e Njeriut.
Gjykata Evropiane për të Drejtat e Njeriut e ndalon ndëshkimin e grevistëve. Vendimet dhe konventat e Këshillit të Evropës dhe Gjykatës Evropiane konsiderohen mbi Kushtetutën dhe ligjet e Kosovës.
Nagavci ua lë fajin komunave për punën e pagave të mësimdhënësve
Një rast i tillë kishte ndodhur edhe në Turqi, ku Gjykata Evropiane kishte marrë vendim se Turqia kishte shkelur të drejtat e njeriut në rastin e 3 grevistëve të ndëshkuar nga ky shtet.
Tre shtetasit turq, Saime Özcan, Güldeniz Kaya dhe Ahmet Seyhan u penalizuan për pjesëmarrje, si mësues dhe anëtarë të sindikatës Eğitim Sen, në ditët kombëtare të aksionit të grevës të organizuar nga sindikata në dhjetor 2000 dhe dhjetor 2003.
Özcan iu dha një dënim penal me kusht (një dënim me burg mbi tre muaj plus një gjobë) dhe u ndaluan nga shërbimi publik për dy muaj e gjysmë. Efektet e këtij dënimi penal vazhduan për disa vite, derisa u shfuqizua në vitin 2007 pas hyrjes në fuqi të Kodit të ri Penal. Ndërsa Kaya dhe Seyhan morën paralajmërime disiplinore.
Tre ankuesit pretenduan se e drejta e tyre për lirinë e organizimit, sipas nenit 11, ishte shkelur si rezultat i dënimit penal dhe paralajmërimeve që ata kishin marrë. Duke u mbështetur gjithashtu në nenin 13, Kaya dhe Seyhan pohuan më tej se nuk kishte asnjë mjet juridik për ta në Turqi për të kundërshtuar masën e marrë kundër tyre.
Kërkesat u depozituan në Gjykatën Evropiane të të Drejtave të Njeriut më 25 maj dhe 30 korrik 2004.
Neni 11
Gjykata Evropiane vendosi se gjobat për të cilat u ankuan, edhe pse shumë të lehta në rastin e Kaya dhe Seyhan, kishin qenë të tilla që të largonin anëtarët e sindikatave nga pjesëmarrja legjitime në greva ose veprime të tjera sindikatash dhe nuk kishin qenë “të nevojshme në një shoqëri demokratike”. Prandaj, kishte pasur një shkelje të së drejtës për lirinë për të demonstruar.
Neni 13
Gjykata vlerësoi se nuk i ishin dhënë asnjë garanci Kaya dhe Seyhan për të parandaluar abuzimin e mundshëm ose thjesht për të lejuar një rishikim të ligjshmërisë së masave disiplinore, si ajo e vendosur ndaj tyre. Në fakt, Kushtetuta dhe ligji nuk parashikonin shqyrtim gjyqësor të paralajmërimeve apo vërejtjeve. Asnjë provë nuk ishte paraqitur, gjithashtu, për ekzistencën e ndonjë praktike gjyqësore autoritare për efektin e kundërt, para datës së kërkuesve. /Demokracia
