Ngërçi politik vazhdon, dështon edhe tentimi i 36-të për konstituimin e Kuvendit

Seanca për konstituimin e legjislaturës së re të Kuvendit të Kosovës ka dështuar përsëri, pasi nuk u arrit kuorumi i nevojshëm.

Ky ishte tentimi i 36-të me radhë që dështoi për shkak të mungesës së kuorumit për votimin e Komisionit që do të mbikëqyrte procesin e votimit të fshehtë për kryeparlamentar.

Kjo dështoi për shkak se PDK, LDK, Lista Serbe, AAK e Nisma po vazhdojnë të mos propozojnë emra për anëtarë të këtij komisioni dhe të mos marrin fare pjesë në votim.

Të pranishëm në seancë ishin 99 deputetë, pro formimit të komisionit votuan 53 deputet, një votë ishte kundër dhe asnjë abstenim.

Kuvendi ka 120 deputetë, ndërsa partia në pushtet ka 48, të pamjaftueshëm për të përmbyllur procesin pa përkrahje nga partitë e tjera.

Pavarësisht thirrjeve të shumta publike për tejkalim të krizës institucionale, palët politike vazhdojnë të qëndrojnë të palëkundura në pozicionet e tyre.

Seanca e radhës do të mbahet të mërkurën me fillim nga ora 11:00.