Nganjëherë bie edhe vetë në gropën që e ke hapur me duart e tua!

Aktori Çun Lajçi, vë në dyshim se Ramush Haradinaj dhe Përparim Rama nuk ishin në inaugurimin e presidentit amerika Donald Trump.

“Ndërskamcat nuk e rrëzojnë domosdoshmërisht tjetrin; nganjëherë bie edhe vetë në gropën që e ke hapur me duart e tua!”, shkruan ai.

Shkrimi i plotë:

Ndërskamcat nuk e rrëzojnë domosdoshmërisht tjetrin!

Sot s’po më punojnë gishtat. Jam me nerva!

E hallakat internetin, shikoj televizor, e kërkoj kokën vezulluese t’Ramushit e mjekrrën e thime t’Përparimit në sallën e inaugurimit të Presidentit Trump, por kot – nuk gjenden.

– Hej!

S’është kryetari i AAK!

S’është kryetari i Komunës së Prishtinës!

Dhe …

Ceremonia e betimit të Presidentit Trump “zbehet krejtësisht”!

Nervat tensionohen edhe më shumë kur lexoj letrën e njërit nga Uashingtoni:

– “Ata mbetën duke pritur Grenellin që t’i fuste në sallën e inaugurimit, por ç’të bësh kur edhe Grenellit ia mbyllën derën, sepse i vinte era myk nga rublat ruse. Ata mbetën në kafene, duke cingëruar gotat dhe duke e lutur që t’i ndihmonte edhe një herë për fitoren e “domosdoshme” në zgjedhjet e 9 shkurtit. Por – dy herë nuk të troket vera te dera, dhe tani ata po presin të kthehen n’Kosovë me thesin bosh!

Jam bërë shumë nervoz, sepse për pesë ditë qëndrimi në Amerikë i kan humbur 10 fushata n’Kosovë, dhe kur të vijë 9 shkurti, do të mbeten të kacavjerrur në gardhin e ëndrrave, pa e shkelur dot ograjën e Albin karajfilit!

E sheh çfarë të bën mendja e keqe? Ndërskamcat nuk e rrëzojnë domosdoshmërisht tjetrin; nganjëherë bie edhe vetë në gropën që e ke hapur me duart e tua!

Sot s’po më punojnë gishtat. M’ka bërë me nerva letra e njërit nga Uashingtoni!